Արմավիրի մարզպետին դուր չի գալիս քարոզչական պաստառների առատությունը
Արմավիրի մարզպետ Համբարձում Մաթևոսյանին դուր չի գալիս մարզում քարոզչական պաստառների առատությունը: Նա նկատում է, որ ավելի «քաոսային» վիճակում Էջմիածին քաղաքն է: Մարզպետի խոսքերով՝ վերջին մի քանի օրում այնքան շատ են քարոզչական բնույթի նյութեր փակցնում, որ մարզպետարանի ու համայնքապետարանների միջոցները չեն բավականացնում չնախատեսված վայրերում փակցված պաստառները հեռացնելուն:
Մարզպետն ասում է, որ փորձում են ընդամենը կանխել: Համբարձում Մաթևոսյանի խոսքով՝ շահարկումներից խուսափելու նպատակով քարոզարշավի ընթացքում որևէ թեկնածուի հետ չի հանդիպել, այդ թվում՝ իր ընկերների: Իսկ քարոզարշավից առաջ թեկնածուներին հորդորել է պատասխանատվություն ստանձնել փակցված պաստառները հեռացնելու համար:
«Այսօր քաղաքական ծրագրեր են առաջ քաշում, խոսում են ամեն ինչը լավ դարձնելու մասին, բայց պաստառներով արդեն իսկ սկսում են օրենք խախտել»,- ասում է Արմավիրի մարզպետը:
«Հետք»-ն անդրադարձել էր Էջմիածնում ստեղծված անվերահսկելի իրավիճակին: Թեկնածուները կամ նրանց կողմնակիցները քարոզչանյութերը զանգվածաբար փակցնում են բազմաբնակարան շենքերին, Մայր Աթոռի այգու պարիսպներին, ճանապարհներին տեղադրված արագաչափերի վրա և այլն:
Մեկնաբանել