HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Պատգամավորության թեկնածու. «Եթե բարձր թոշակ լինի, ես ինչի պիտի այս սիրուն երկիրը թողնեմ գնամ Ռուսաստան»

Երկրով մեկ տարածված քարոզչաթերթիկների մեջ բացակայում է պատգամավորության թեկնածու Սվետլանա Մելքոնյանին վերաբերող որևէ քարոզչական նյութ: Նա գեթ մեկ պաստառ չի տպել ու չի փակցրել: «Ինչի գովազդ անեմ ինձ, Էջմիածնում ամեն երկրորդ մարդն ինձ ճանաչում է: Բնակիչներն իմ աշակերտներն են: Բացի այդ, ինձ որտեղի՞ց գումար, որ բուկլետներ տպեմ: Ես թոշակառու եմ»,- ասում է թեկնածուն:

Սվետլանա Մելքոնյանը «Օրինաց երկիր» կուսակցության ընտրական ցուցակի երկրորդ մասում տեղ գտած ազգային փոքրամասնության միակ ներկայացուցիչն է, ազգությամբ ռուս է:

Հիշեցնենք, որ «Ընտրական օրենսգրքի» համաձայն՝ կուսակցությունների կամ դաշինքների համապետական ընտրական ցուցակը կարող է ունենալ երկրորդ մաս, որում կարող են ընդգրկվել ընտրություններին նախորդող վերջին մարդահամարի տվյալներով առավել մեծ թվով մշտական բնակչություն ունեցող առաջին չորս ազգային փոքրամասնությունների ներկայացուցիչներ: 2011թ. մարդահամարի տվյալներով` Հայաստանում առավել մեծ թվով մշտական բնակչություն ունեցող առաջին չորս ազգային փոքրամասնությունները եզդիներն են, ռուսները, ասորիներն ու քրդերը: Որպես ազգային փոքրամասնություն ռուսները Հայաստանում երկրորդ տեղում են՝ 11.911 մարդ: Առաջին տեղում եզդիներն են՝ 35.308 մարդ:

Սվետլանա Մելքոնյանն ասում է, որ Հայաստանում ազգային փոքրամասնության ներկայացուցիչները, այդ թվում՝ ռուսները, որևէ խտրական վերաբերմունքի չեն արժանանում, ապրում են հավասար պայմաններում, ինչ ազգությամբ հայերը: Սակայն որոշել է պատգամավոր ընտրվել սոցիալական հարցեր առաջ քաշելու համար:

«Հետք»-ի հետ զրույցում Սվետլանա Մելքոնյանը պատմեց, որ 40 տարի է՝ ապրում է Հայաստանում: Ամուսնանալուց հետո 30 տարուց ավելի զբաղվում է մանկավարժությամբ: Նա Էջմիածնի դպրոցներից մեկում ռուսաց լեզվի ուսուցչուհի է: Ասում է, որ 45 հազար դրամ թոշակ է ստանում և քիչ է համարում իր 30-ամյա աշխատանքային տարիների դիմաց:

«Այս հարցն անհանգստացնում է ոչ միայն ռուսներին, այլև բոլոր տեղացիներին, այդ թվում՝ հայերին: Եթե երեխա չունենամ, օգնող չունենամ, կոմունալ վճարումները կատարելուց հետո ես պիտի սոված մնամ: Տեսեք ինչքան միայնակ մարդիկ կան, ովքեր հարազատ չունեն: Ընդունենք հայերը ազգականներ, բարեկամներ ունեն, իրենց օգնում են, իսկ ինչ անեն ազգային փոքրամասնության այն ներկայացուցիչները, ովքեր այստեղ ոչ մի բարեկամ չունեն և ապրում են այդքան քիչ թոշակով»,- ասում է 64-ամյա Սվետլանա Մելքոնյանը:

Պատգամավորության թեկնածուն ասում է, որ իր ծնողները Ռուսաստանում ևս ուսուցիչներ են եղել: Իսկ ինքը խորհրդային կարգերի ժամանակ է սկսել աշխատել: Այդ ժամանակ մանկավարժների և թոշակառուների համար կային սոցիալական երաշխիքներ: Ձմռանը տրամադրվում էր վառելանյութ, էլեկտրաէներգիայի, գազի համար տրվում էին զեղչեր, ինչը շատ մեծ օգնություն էր: Այժմ նման երաշխիքներ չկան: Տարեցները դժվարությամբ են ապրում:

«Մեր խնդիրը սոցիալական է, քաղաքական խնդիրներ չունենք: Այս հարցերի պատճառով է, որ առաջադրվեցի որպես պատգամավորության թեկնածու: Ես գոնե լավ գիտեմ, թե ինչ ցավոտ խնդիրներ ունեն ուսուցիչները ու կապ չունի, թե ինչ ազգի ներկայացուցիչ են նրանք: Իհարկե, եզակի խնդիրներ առաջանում են, բայց դա կապ չունի ազգային պատկանելիության հետ»,- ասում է պատգամավորության ազգությամբ ռուս թեկնածուն:

Նրա խոսքերով՝ «Օրինաց երկիր» կուսակցության ցուցակով է գնում ընտրության, քանի որ հավանել է կուսակցության ծրագիրը: Առանձնացնում է գյուղատնտեսությանը վերաբերող մասը, մասնավորապես՝ ոռոգման ջրերի հարցը: Նշում է, որ իր ամուսնու ազգականներն ապրում են գյուղերում և դժվարություններ ունեն ոռոգման ջրի հարցում: Նրանց երեխաներն արդեն հեռացել են երկրից, քանի որ վարկային բեռի տակ են և դժվարանում են պարտավորությունները կատարել: Հող մշակել չի լինում, իսկ աշխատանք դժվար է գտնել: Սվետլանա Մելքոնյանը ցավով արձանագրում է, որ այսօր մարդիկ ընտրություն են կատարում ոչ քաղաքական ուժերի ծրագրերի հիման վրա: Խոստովանում է, որ տարիներ առաջ իր նախընտրած կուսակցությունը սխալվել է, սակայն զղջացել է, և վստահ է, որ նույն սխալն այլևս չի կրկնվի:

«Եթե երկրում սոցիալական հարցերը կարգավորվեն ոչ մի երիտասարդ երկրից չի գնա: Իսկ ինչ է կատարվում հիմա, յուրաքանչյուր երկրորդ երիտասարդը գնում է Ռուսաստան: Տվեք նորմալ աշխատանք, աշխատավարձ, և նրանք չեն գնա: Իմ երեխաները նույնպես Ռուսաստանում են: Հարսս գնաց և հետ եկավ թոռներիս հետ: Եթե բարձր թոշակ լինի, ես ինչի պիտի այս սիրուն երկիրը թողնեմ, գնամ Ռուսաստան: Ճիշտ է, Ռուսաստանն իմ հայրենիքն է, բայց իմ կյանքի կեսը Հայաստանում եմ անցկացրել, սա դարձել է իմ հայրենիքը»,- ասում է Սվետլանա Մելքոնյանը:

Նա պատմեց, որ Հայաստանը հարուստ երկիր է: Ինքը չի գնում Ռուսաստան, քանի որ արդեն չի կարողանում Հայաստանից դուրս ապրել: Այնտեղ ունի քույր, եղբայր, ազգականներ, սակայն Ռուսաստանում միայն հյուրի կարգավիճակով է իրեն պատկերացնում: Սվետլանա Մելքոնյանը նշում է, որ Ռուսաստանում ևս հեշտ չէ աշխատանք գտնելը, սակայն չի հասկանում, թե ինչու են մարդիկ գնում: Օրինակ, մարզերում ռուսներն ավելի բարձր են վարձատրվում, քան ոչ քաղաքացիները: Իր ընտանիքի օրինակով ներկայացրեց, որ որդին աշխատել է ճանապարհաշինական ծրագրերում, խաբել, աշխատավարձը չեն տվել, և եղել են դեպքեր, որ դատարկ է վերադարձել տուն: Բայց միևնույն է, ձգտում է գնալ:

Սվետլանա Մելքոնյանն ասում է, որ Հայաստանը ներուժ ունեցող երկիր է, պարզապես լավ ղեկավարներ են պետք երկիրը ոտքի կանգնեցնելու համար: Շեշտում է հատկապես մարդկային ռեսուրսը, որ այստեղ ջերմ են, հյուրընկալ: Բնությունը ևս հօգուտ մեզ է, սակայն դրանից չենք օգտվում: Ասում է, որ բոլոր նախադրյալները կան տուրիզմը զարգացնելու համար, իր ռուս ազգականները ևս հավանել են երկիրը: Այստեղի բանջարեղենի, մրգերի համը ոչ մի երկրում չկա: Սակայն դարձյալ ամբողջությամբ չենք օգտվում բնության պարգևից:

Հարցի լուծումը պատկերացնում է միայն տնտեսության զարգացման մեջ: Օրինակը, նշում է, որ ժամանակին Էջմիածնի մի քանի գործարաններ են աշխատել: Այսօր գրեթե աշխատող գործարան չկա: Եթե այդ ամենը նորից գործարկվի, աշխուժություն կառաջանա և քաղաքներում, և երկրում:

«Էջմիածնում երիտասարդների կեսը վարձով է ապրում: Առաջվա նման չի, որ վատ ապրեն, բայց սկեսուր-սկեսրայրի հետ ապրեն: Հիմա ձգտում են առանձնանալ, բայց տուն չունեն, մարզերում ծրագրեր չկան: Մի նայեք, որ ես ռուս եմ, ճիշտ եմ ասում, սրտացավ եմ ասում»,- հավելում է պատգամավորության թեկնածուն:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։