HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Արմավիրի մարզպետ. «Եթե որևէ ճնշում լինի, առաջին մարդը, որ աշխատանքից կհեռանա, կլինեմ ես»

Արմավիրի մարզպետ Համբարձում Մաթևոսյանը «Հետք»-ի հետ զրույցում պարզաբանել է, թե ինչու է «Վաղարշապատի հիվանդանոց» պետական ՓԲԸ-ի տնօրենի պաշտոնում նշանակել նույն հիվանդանոցի վնասվածքաբան Գոռ Ասատրյանին: Ասում է, որ աննախադեպ թվով թեկնածուներ էին առաջադրվել տնօրենի պաշտոնի համար: Բոլոր թեկնածուների հետ հանդիպել է մրցույթի ժամանակ, որևէ մեկին չի ճանաչել:

«Ես հստակ չեմ կարող ասել, թե 3 թեկնածուներից որ մեկն է ավելի լավ կառավարիչ կամ բժիշկ, բայց բոլորն էլ լավ հասկանում են, որ նշանակվելու էր միայն մեկը: Եթե օբյեկտիվ որոշում կայացվեր, ուրեմն պետք է 3 թեկնածուներին էլ նշանակեի տնօրենի պաշտոնում, ինչը հասկանում ենք, հնարավոր չէր: Հայեցողական կարգով որոշում եմ կայացրել և 3 թեկնածուներից տնօրենի պաշտոնում նշանակել եմ Գոռ Ասատրյանին: Հաշվի եմ առել մի շարք փաստեր: Բայց իմ որոշումը չի թերագնահատում մյուսների կարողությունները թե՛ կառավարչական, թե՛ բժշկական հարցերում»,- ասում է մարզպետ Մաթևոսյանը:

Հիշեցնենք, որ նոյեմբերի 27-ին Արմավիրի մարզպետարանում կայացել է մարզպետարանի ենթակայության տակ գտնվող «Վաղարշապատի հիվանդանոց» պետական ՓԲԸ-ի տնօրենի թափուր տեղի համար հայտարարված մրցույթը: Մարզպետ Համբարձում Մաթևոսյանը հաղթողներից Գոռ Ասատրյանի հետ կնքել է աշխատանքային պայմանագիր, ինչը լարվածություն է առաջացրել հիվանդանոցում: Թեկնածուներից Արտակ Իսախանյանը պարզաբանում էր պահանջում մարզպետից՝ կասկածի տակ դնելով օբյեկտիվությունը:

Հիվանդանոցի տնօրենի պաշտոնը զբաղեցնելու համար դիմել էր 16 անձ: Նրանցից 5-ը եղել են նույն հիվանդանոցի աշխատակիցներ: Մրցույթին ներկայացել են դիմումատուներից 11-ը, որոնցից միայն 10-ն է ստացել մրցույթին մասնակցելու իրավունք: Մրցույթն իրականացվել է երեք փուլով` թեստավորում, հարցազրույց և կազմակերպության զարգացման ծրագրի ներկայացում: Հարցազրույցի փուլը հաղթահարել է 9 դիմումատու՝ ճիշտ պատասխանելով թեստավորման առաջադրանքների առնվազն 90%-ին: Մասնակիցներից հաջորդ` ծրագրի ներկայացման փուլ էին անցել միայն 3-ը` նույն հիվանդանոցի տնօրենի ժամանակավոր պաշտոնակատար Արտակ Իսախանյանը, հիվանդանոցի վնասվածքաբան Գոռ Ասատրյանը և Օլգա Մարգարյանը:

Արմավիրի մարզպետն ասում է, որ Գոռ Ասատրյանի հեռանկարային ծրագրի վրա է ուշադրություն դարձվել, բացի այդ, թե՛ կրթությամբ, թե՛ փորձով համապատասխանում էր պաշտոնին, ծանոթ էր հիվանդանոցին: Հավելում է, որ որոշ չափով նույնը կարող է ասել նաև մյուս թեկնածուների մասին, սակայն իրենց տեսլականը համընկել է Գ. Ասատրյանի տեսլականի հետ, և վստահ է, որ վերջինս կհաջողի իրագործել առաջ քաշած ծրագրերը:

«Անկախ ամեն ինչից, ես չեմ բացառում, որ թերացումներ կլինեն, եթե լինեն մենք կաշկանդված չենք նոր որոշում կայացնելու համար»,-ասում է Համբարձում Մաթևոսյանը: Անդրադառնալով թեկնածուներից մեկի այն պնդմանը, որ մարզպետը ճնշման ազդեցության տակ է պայմանագիր կնքել Գոռ Ասատրյանի հետ՝ Հ. Մաթևոսյանը բացասական պատասխան տվեց: Նշեց, որ ինքը համաձայնել է աշխատել մարզպետի պաշտոնում՝ պայմանով, որ իր նկատմամբ որևէ ճնշում չի լինելու ոչ մեկի կողմից: Քանի որ այդ պաշտոնում արդեն աշխատում է, ասում է, որ որևէ ճնշում լինել չի կարող:

«Եթե որևէ ճնշում լինի առաջին մարդը, որ աշխատանքից կհեռանա, կլինեմ ես: Ավելի լավ է նման նշանակում չանեմ ու չաշխատեմ, քան թե անեմ ու իմ մոտեցումներին դավաճանեմ: Աշխատում ենք անաչառ»,- ասում է Արմավիրի մարզպետը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter