Խորհրդարանն այսօր, ինչպես և երեկ, չունի քվորում աշխատանքները սկսելու համար: Նիստը վարող ԱԺ նախագահ Արա Բաբլոյանը, տեսնելով դահլիճում գտնվող ներկաների թվաքանակն, ասաց.

«Փորձառություն ունենք, պետք է գրանցվենք ու սպասենք, որ չորս ժամում կարողանանք հավաքագրել այդքան գործընկերներ»,- ասաց Բաբլոյանը:

12:15-ի դրությամբ նիստին գրանցվել է 14 պատգամավոր:

Ըստ ԱԺ կանոնակարգ-օրենքի՝ պատգամավորները կարող են գրանցվել նիստը սկսվելուց հետո մինչև 4 ժամվա ընթացքում:

Հիշեցնենք, որ օրակարգում այլ հարցերի հետ ընդգրկված են նաև ԱԺ ՀՀԿ խմբակցության պատգամավոր Արամ Հարությունյանին՝ պատգամավորական անձեռմխելիությունից զրկելուն և նրա նկատմամբ քրեական գործ հարուցելուն գլխավոր դատախազի ներկայացրած միջնորդությունները: