Նախկին փոխվարչապետ Արմեն Գևորգյանի պաշտպանները մասնակի բողոքարկել են նրա վերաբերյալ առաջին ատյանի դատարանի կայացրած դատական ակտը: Այս մասին «Հետք»-ի հետ զրույցում ասաց Գևորգյանի պաշտպան Էրիկ Ալեքսանյանը:

Փաստաբանի խոսքով` դատարանը գտել է, որ  Գևորգյանին մեղսագրվող երկու հոդվածների՝ սահմանադրական կարգի տապալմանն օժանադակելու և պաշտոնատար անձի կողմից առանձնապես խոշոր չափի կաշառք ստանալու դեպքում առկա չէ հիմնավոր կասկած, որ նա կատարել է իրեն վերագրվող արարքները, սակայն նրան մեղսագրվող 190-րդ հոդվածի՝ փողերի լվացման դեպքում արձանագրել է, որ հիմնավոր կասկածն այն  մասին, որ Գևորգյանը կատարել է իրեն վերագրվող արարքն, առկա է, բայց չկան նրան կալանավորելու հիմքեր:

Այս վերջին հանգամանքն է, որը Գևորգյանի պաշտպանական կողմը վիճարկում է:

«Մենք Վերաքննիչ բողոք ենք ներկայացրել` դատարանից խնդրելով փոփոխել  առաջին ատյանի դատարանի պատճառաբանությունը՝ կապված Քրեական օրենսգրքի  190 հոդվածի հետ և  կայացվող նոր դատական ակտով հաստատված համարել հանգամանքը, որ առկա չէ հիմնավոր կասկած առ այն, որ Արմեն Գևորգյանը  կատարել է Քրեական օրենսգրքի 190-րդ հոդվածով իրեն մեղսագրվող արարքը»,-   ասաց  Էրիկ Ալեքսանյանը:

Նշենք, ո ր Դատախազությունը ևս բողոքարկել է Արմեն Գևորգյանի կալանքի միջնորդության վերաբերյալ առաջին ատյանի դատարանի կայացրած որոշումը: Երկու կողմերի բողոքներն էլ ստացվել են Վերաքննիչ դատարան, սակայն նիստի օր դեռևս  նշանակված չէ:

Հիշեցնենք, որ  դեկտեմբերի 14-ին Ե րևան քաղաքի ընդհանուր իրավասության դատարանը, նախագահությամբ դատավոր Արման Հովհաննիսյանի,  մերժել է  նախկին փոխվարչապետ Արմեն Գևորգյանին կալանավորելու վերաբերյալ Հատուկ քննչական ծառայության միջնորդությունը:

Դեկտեմբերի 11-ին Արմեն Գևորգյանին երեք նոր մեղադրանք էր առաջադրվել՝ առանձնապես խոշոր չափերով փողերի լվացում, առանձնապես խոշոր չափերով կաշառք ստանալ և սահմանադրական կարգը տապալելուն օժանդակել, և  նրան կալանավորելու վերաբերյալ միջնորդություն ներկայացրել դատարան: