HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Վերաքննիչ դատարանը քննում է Մանվել Գրիգորյանի խափանման միջոցի հարցը. դատարանի դիմաց բողոքի ակցիա է

Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, քննում է գեներալ Մանվել Գրիգորյանին 25 մլն դրամ գրավի դիմաց ազատ արձակելու որոշման դեմ Դատախազության ներկայացրած բողոքը: 

Դատարանի դիմաց բողոքի ակցիա է. հավաքված քաղաքացիները պահանջում են Գրիգորյանին նորից կալանավորել: 

Մանվել Գրիգորյանն այս պահի դրությամբ բողոքի քննությանը չի ներկայացել: Գործը մակագրվել է դատավոր Արսեն Նիկողոսյանին: Նշենք, որ այս դատավորն առաջին անգամ չէ, որ պետք է քննի Գրիգորյանի խափանման միջոցի վերաբերյալ տարված բողոքը. նա նախկինում մի քանի անգամ քննել է Գրիգորյանի նկատմամբ կալանավորումը որպես խափանման միջոց ընտրելու, նրա կալանքի ժամկետը երկարացնելու վերաբերյալ պաշտպանների ներկայացրած բողոքներն ու մերժել դրանք: 

Հիշեցնենք, որ Մանվել Գրիգորյանի նկատմամբ կալանքը որպես խափանման միջոց ընտրելու, կալանքի ժամկետը երկարացնելու վերաբերյալ բոլոր որոշումներն առաջին ատյանում ևս մեկ դատավոր՝ Մարինե Մելքոնյանն է կայացրել:

Գրիգորյանի խափանման միջոցին առնչվող գործերից մեկը՝ գրավը նրա նկատմամբ թույլատրելի ճանաչելու վերջին միջնորդությունը քննել է այլ դատավոր՝ Դավիթ Բալայանը, և նրա որոշման արդյունքում է, որ Մանվել Գրիգորյանն ազատ է արձակվել: 

Հիշեցնենք, որ Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև Քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Ըստ Դատախազության տարածած հաղորդագրության՝ հունիսի 16-ին օրենքով սահմանված կարգով իրականացված խուզարկություններով Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոիլային պայթաղյուսներ, ավելի քան 17 000 տարբեր տրամաչափի փամփուշտ, այլ ռազմամթերք ու հրազեն:

Խուզարկությամբ հայտնաբերվել է նաև 71 760 000 դրամ, 80 000 ԱՄՆ դոլար, 67 350 եվրո, 246 500 ուկրաինական արժույթ: Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեռ», «Ռենջ ռովեռ սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ:

Արմավիրի մարզի Արշալույս գյուղի համապատասխան հասցեում կատարված խուզարկությամբ՝ կենդանիներ պահելու համար առանձնացված հատվածում հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր:

Հունիսի 16-ին Մանվել Գրիգորյանը ձերբակալվել է, ապա հունիսի 19-ին Ազգային ժողովի պատգամավորների քվերակությամբ զրկվել պատգամավորական անձեռնմխելիությունից ու դատարանի որոշմամբ կալանավորվել:
Կալանքի տակ գտնվելու ընթացքում պատգամավորի պաշտպանները բազմիցս բարձրաձայնել են նրա առողջական խնդիրների մասին, հայտարարել, որ վերջինիս առողջական վիճակն անհամատեղելի է կալանք կրելու հետ, սակայն մինչ Դավիթ Բալայանի որոշումը դատարանները մշտապես երկարացրել են նրա կալանքի ժամկետը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։