Մեկնարկել են յոթերորդ գումարման խորհրդարանի առաջին նստաշրջանի աշխատանքները: Նիստը վարում է տարիքով ամենաավագ պատգամավորը՝ «Իմ քայլը» խմբակցության պատգամավոր, ազգային փոքրամասնության ներկայացուցիչ Կնյազ Հասանովը: Նիստին ներկա են հանրապետության նախագահը, Ամենայն Հայոց կաթողիկոսը և կառավարության անդամները:

Կաթողիկոսը ելույթով հանդես եկավ, որից հետո Տերունական աղոթքը հնչեց: Նիստին ներկա է նաև նախորդ խորհրդարանի ամենաշատ բացակայող պատգամավորը՝ ԲՀԿ նախագահ Գագիկ Ծառուկյանը, վերջինս մինչ նիստի մեկնարկը լրագրողներին խոստացավ, որ գրանցվելուց հետո կպատասխանի լրագրողների բոլոր հարցերին: Ապա ելույթով հանդես եկավ նախագահ Արմեն Սարգսյանը՝ ընդգծելով, որ նոր Հայաստան կառուցելու համար լուրջ բարեփոխումներ պետք է լինեն տարբեր ոլորտներում: Նախագահ Սարգսյանը շնորհավորեց նորընտիր պատգամավորներին.

«Այժմ հույսերի և խոստումների իրականացման և ամենօրյա աշխատանքի փուլ է, հարգելի պատգամավորներ, դուք ստացել ենք լայն հնարավորություններ՝ կյանքի կոչելու թավշյա հեղափոխության գաղափարները և արդարացնելու հասարակության սպասելիքները»,-ասաց նա: