HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մերի Մամյան

Նոր Գյուղում հող չեն գնում, հողը վաճառում են

Կոտայքի մարզի Նոր Գյուղ համայնքում այս տարվա հերթական աճուրդը դարձյալ չկայացավ հայտեր չլինելու պատճառով: Ինչպես գյուղում են ասում՝ այստեղ հող գնող չկա, բոլորը ծախող են: Տեղացիներից շատերն են բանկերից վարկով գումար վերցնում գյուղատնտեսությամբ զբաղվելու համար, սակայն ակնկալած եկամուտը չստանալով` վաճառքի են հանում իրենց սեփականությունը: Նոր Գյուղում մշակում են միայն 1-ին կարգի վարելահողերը, իսկ ավելի ցածրորակ հողատեսակները հիմնականում վաճառում են պարտքերը փակելու համար:

Գյուղի պահուստային ֆոնդում քիչ հողատարածքներ կան, բայց գերակշռում են խոպան հողերը: Գյուղացիների մի մասը փորձում է հողը մշակել, բերք ստանալ, բայց մեկ-երկու տարի եկամուտ չստանալուց հետո թողնում է գործը: Այստեղ հիմնականում բանջարաբոստանային կուլտուրաներ են մշակում, սակայն ինչպես այլ գյուղերում, այստեղ եւս դրանից օգուտ են քաղում միայն վերավաճառողները: Վերջիններս մատչելի գնով ապրանքը գնում են գյուղացիներից, շատ ավելի թանկ վաճառում քաղաքում: Գյուղի տղամարդկանց մի մասը պարբերաբար մեկնում է արտագնա աշխատանքի, որպեսզի թե’ կուտակված պարտքերը փակի, թե’ ընտանիքի կարիքները հոգա:

Համայնքի ղեկավար Գրիշա Թադեւոսյանը նշում է, որ եթե նախորդ տարի գյուղում վիճակը համեմատաբար լավ էր, ապա այս տարի հող գնող չկա: «Ֆոնդային բյուջեն դատարկ է, միայն պարտքեր ունենք»,- ասում է Գ. Թադեւոսյանը: Նախորդ տարիներին համայնքում իրականացվող հողերի վաճառքից ձեւավորվում էր ֆոնդային բյուջեն, բայց հիմա «մեռած վիճակ է»: Չնայած, օրինակ, բնակավայրի նշանակության հողի 1 ք/մ 1242 դրամ է, բայց գոյացած պարտքերը փակելու համար գյուղացիները հողը էժան գնով են վաճառում:

Համայնքապետի նշած պարտքը գոյացել է գյուղում կոյուղագիծ անցկացնելու արդյունքում: Գյուղը կոյուղի չի ունեցել, սկսել են իրականացնել աշխատանքները, սակայն դրանք ընդհատվել են, որովհետեւ համայնքապետարանը գումարների մի մասը չի վճարել: Այժմ մոտ 17 մլն դրամի պարտք է գոյացել:

Համայնքապետն ստեղծված վիճակը մի կողմից կապում է սոցիալ-տնտեսական ծանր վիճակին, մյուս կողմից` համեմատելով 20 տարի առաջ եղած վիճակի հետ, նշում է, որ այն ժամանակ ավելի վատ էր:

Գյուղը մոտ է թե’ Աբովյան քաղաքին, թե’ մայրաքաղաք Երեւանին: Տեղացիների կապը քաղաքների հետ սերտ է: Համայնքապետը բացատրում է, որ միջազգային կազմակերպությունները, որոնք համաֆինանսավորմամբ տարբեր ծրագրեր են իրականացնում համայնքներում, մայրաքաղաքին մոտ համայնքները գրեթե չեն ներառում իրենց ծրագրերում: Նա համամիտ է, որ այդ օգնության կարիքն ավելի շատ ունեն սահմանամերձ համայնքները:

Նոր Գյուղում թե' ոռոգման, թե' խմելաջրի հարցը մասնակի է լուծված, իսկ միջգյուղական ճանապարհի բարեկարգ հատվածը միայն կենտոնական փողոցն է: Համայնքապետն ասում է, որ ճանապարհների բարեկարգումը մեծ գումարների հետ է կապված, որը չի կարող իրականացնել, «եթե անգամ ամբողջ գյուղը ծախի»: Համայնքի մանկապարտեզներից մեկը չի գործում, իսկ դպրոցի շենքը վթարային է դարձել 1988 թ.-ի երկարաշարժից հետո եւ համարվում է 3-րդ կարգի վթարային շենք: Չնայած բարեկարգման որոշ աշխատանքներ արվել են, բայց գյուղի դպրոցին նոր շենք է անհրաժեշտ:

«Շատ բաներ կան, որ պետք է անես, բայց գրպանիդ պետք է նայես», - ասում է Գ. Թադեւոսյանը: Վերջինս ափսոսում է, որ այժմ տնտեսության վիճակն այսքան թույլ է. ԽՍՀՄ փլուզումից հետո համատարած մասնավորեցումները բավականին վնաս հասցրեցին տնտեսությանը: Գյուղատնտեսության վրա էլ բացասական է ազդել կոլտնտեսությունների վերացումը: «Հիմա գյուղացուն իր չարչարանքն է մնում, բայց գյուղը պետք է ապրի, որ քաղաքն էլ ապրի», - ասում է Թադեւոսյանը:

Նրա կարծիքով՝ գյուղատնտեսությունը զարգացնելու համար պետք է գյուղատնտեսական վարկերն այդքան բարձր տոկոսադրույքներով չտրվեն: Միաժամանակ համոզված է, որ այս վիճակը ժամանակավոր է: «Աստված տա՝ խաղաղություն լինի երկրում, մնացածն աստիճանաբար կուղղվի», - եզրափակում է Թադեւոսյանը:

Մեկնաբանություններ (2)

Имя
Не Нор Гехи, а Нор Гюх. Это разные села. Не нужно путать. Насчет аукциона - никто из жителей не знает про это, вот и нету заявок. Земли распродали без аукциона. Свободных земель практически нету. Мне с трудом достался свободный участок. Питьевая вода в селе левая, без счетчиков, и не принадлежит Джрмуху. Прокладывать трубы жителям новокупленных участков приходится за свой счет. Электричество хоть и подключают без проблем, и новые столбы устанавливают без проблем, но напряжение в сети часто падает вплоть ниже 160 вольт. Мощности не хватает.
Մարատ
Նոր Գյուղի վիճակակը կարելի է ասել , որ ամբողջ Հայաստանի մարզերում է այդպես: Թող երկրին խաղաղություն լինի, բայց Հայաստանի այս կառավարումով երբեք էլ չի ուղղվի...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter