HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

13 պետական ծառայող դատապարտվեց մահացած կամ Հայաստանից բացակայող կենսաթոշակառուների թոշակները յուրացնելու համար

Սոցիալական ապահովության պետական ծառայության նախկին պետ Վազգեն Խաչիկյանն այսօր դատապարտվեց 12 տարվա ազատազրկման (մեղադրող դատախազը պահանջել էր 13 տարի):

Սա ամենաբարձր պատժաչափն էր, որ գործով ներգրավված 13 պետական ծառայողների նկատմամբ կիրառեց Կենտրոն և Նորք-Մարաշ վարչական շրջանների ընդհանուր իրավասության դատարանը`դատավոր Արշակ Վարդանյանի նախագահությամբ: Խաչիկյանից և մյուս 12 ամբաստանյալներից հօգուտ պետության կբռնագանձվի 296 115 252 ՀՀ դրամ:

Շուրջ 10 ամիս տևած դատավարությունն այսօր ավարտվեց Սոցիալական ապահովության պետական ծառայության 13 նախկին պաշտոնյաների ու աշխատակիցների մեղադրական դատավճիռներով: Բոլոր 13 անձինք դատապարտվեցին` մեղադրվելով 2006-2010 թվականներին կազմակերպված խմբով մահացած կամ Հայաստանից բացակայող կենսաթոշակառուների թոշակների ավելի քան 260 միլիոն դրամ գումարը յուրացնելու մեջ:

4 ամբաստանյալներ ` Վիգեն Գևորգյանը, Աշոտ Աբրահամյանը, Վահագն Խաչատրյանը, Հովհաննես Գրիգորյանը դատապարտվեցին 5,5 –ական տարվա ազատազրկման:

Սամվել Էլբակյանը, Հովհաննես Հովհաննիսյանը, Արթուր Սուքիասյանը, Սարգիս Սարգսյանը, Համլետ Մարտիրոսյանը, Հրանուշ Դանիելյանը, Բագրատ Մուրադյանը և Արմեն Խաչատրյանը թեև դատապարտվեցին 1 տարի 8 ամսից մինչև 4 տարի 5 ամիս չափով ազատազրկման, այնուամենայնիվ դատարանը նրանց նկատմամբ պատիժը պայմանականորեն չկիրառելու որոշում կայացրեց` սահմանելով 1-ական տարի ժամկետով փորձաշրջան: Կալանքի տակ գտնվող 3 ամբաստանյալ ազատ արձակվեց դատարանի դահլիճից:

Հիշեցնենք, որ 13-ից 7 ամբաստանյալների նկատմամբ որպես խափանման միջոց կիրառվել էր կալանավորումը, իսկ 6-ի նկատմամբ` չհեռանալու մասին ստորագրություն: Սոցիալական ապահովության պետական ծառայությունում հայտնաբերված չարաշահումների առթիվ Գլխավոր դատախազությունում քրեական գործ էր հարուցվել 2011 թ-ին, 2012 թ-ի սեպտեմբերի 28-ից 13 ամբաստանյալներից 7-ի նկատմամբ որպես խափանման միջոց ընտրվել էր կալանքը: Առաջադրված մեղադրանքում իրեն ամբողջությամբ մեղավոր էր ճանաչել միայն ամբաստանյալ Արթուր Սուքիասյանը: Իսկ Վազգեն Խաչիկյանն իրեն մեղավոր չէր ճանաչել: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter