Մանվել Գրիգորյանի փաստաբանի և ցուցարարների միջև տեղի ունեցած միջադեպի առթիվ քրեական գործ չի հարուցվել
Մանվել Գրիգորյանի փաստաբան Արսեն Մկրտչյանի մեքենան առերևույթ վնասելու դեպքի առթիվ նախապատրաստվող նյութերի հիման վրա քրեական գործ չի հարուցվել: Այս մասին մեզ հետ զրույցում ասաց ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը: Վերջինիս խոսքով՝ քրեական գործ չի հարուցվել Քրեական դատավարության օրենսգրքի 35-րդ հոդվածի 1-ին կետի 2-րդ մասի հիմքով, այսինքն՝ հանցակազմի բացակայության:
Հիշեցնենք, որ հունվարի 11-ին, Մանվել Գրիգորյանի խափանման միջոցի գործով դատական նիստից հետո նրա ազատազրկումը պահանջող ցուցարարների և փաստաբան Արսեն Մկրտչյանի միջև միջադեպ էր տեղի ունեցել:
Ցուցարարները Արսեն Մկրտչյանին մեղադրել էին գումարի համար Մանվել Գրիգորյանի պաշտպանությունը ստանձնելու, ինչպես նաև այն բանի մեջ, որ լրագրողների հետ զրույցում իրենց «թափթփուկ» է անվանել, սակայն Մկրտչյանը նման արտահայտություն չէր արել:
Նույն օրը փաստաբանը «Ֆեյսբուք» սոցիալական ցանցի իր էջում տեղադրել է իր մեքենայի լուսանկարները: Դրա վրա առկա են ինչ-որ հետքեր: Մկրտչյանի խոսքով՝ երբ ինքը մեքենայի մեջ է եղել դատարանի դիմաց, ցուցարարները դրա վրա ինչ-որ հեղուկ են լցրել: Բացի այդ, դատարանի դիմաց հավաքված ցուցարարներից մեկը թքել էր փաստաբանի մեքենայի վրա:
Մեզ հետ զրույցում Արսեն Մկրտչյանը նշեց, որ ինքը տեղի ունեցածի առթիվ բողոք չի ներկայացրել:
Նշենք, որ այժմ Արսեն Մկրտչյանն ու ցուցարարներն, այսպես ասած՝ հաշտվել են միմյանց հետ:
Մեկնաբանել