Վերաքննիչ քրեական դատարանում այսօր շարունակվում էր Մանվել Գրիգորյանի խափանման միջոցի գործով դատական նիստը: 

Այսօր դատարանի դիմաց դարձյալ քաղաքացիներ էին հավաքվել, սակայն նախորդ օրերի համեմատ՝ նրանց թիվն անհամեմատ քիչ էր: Վերջիններս նշում էին, որ չեն պատրաստվում փակել փողոցները, թեև Գրիգորյանի խափանման միջոցի գործով դատական նիստի առաջին օրերին փակել էին որոշ ճանապարհներ, վիճաբանության մեջ մտել նրա փաստաբան Արսեն Մկրտչյանի հետ:

Նշենք, որ այսօր դատական նիստի ընթացքում դատավոր Արսեն Նիկողոսյանին ինքնաբացարկի հերթական միջնորդությունն է ներկայացվել, որով դեռևս որոշում չի կայացվել:

Դատարանը քննում է ինչպես Գրիգորյանին գրավի դիմաց ազատ արձակելու Դատախազության, այնպես էլ Գրիգորյանի կալանքի ժամկետն ավելի վաղ երկարացնելու վերաբերյալ պաշտպանական կողմի բողոքները:

Գրիգորյանի պաշտպան Արսեն Մկրտչյանը հաջորդ դատական նիստի օրը լրագրողներին չասաց:

Նիստի ավարտից հետո դատարանի դիմաց հավաքված ցուցարարները զրուցեցին Արսեն Մկրտչյանի հետ, և նշեցին, որ նրա դեմ ոչինչ չունեն, որ հարգում են նրա աշխատանքը: Ցուցարարների և Մկրտչյանի զրույցն ավարտվեց ձեռքսեղմամբ ավարտվեց:

Հիշեցնենք, որ Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև Քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Ըստ Դատախազության տարածած հաղորդագրության՝ հունիսի 16-ին օրենքով սահմանված կարգով իրականացված խուզարկություններով Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոիլային պայթաղյուսներ, ավելի քան 17 000 տարբեր տրամաչափի փամփուշտ, այլ ռազմամթերք ու հրազեն:

Խուզարկությամբ հայտնաբերվել է նաև 71 760 000 դրամ, 80 000 ԱՄՆ դոլար, 67 350 եվրո, 246 500 ուկրաինական արժույթ: Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեռ», «Ռենջ ռովեռ սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ:

Արմավիրի մարզի Արշալույս գյուղի համապատասխան հասցեում կատարված խուզարկությամբ՝ կենդանիներ պահելու համար առանձնացված հատվածում հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր:

Հունիսի 16-ին Մանվել Գրիգորյանը ձերբակալվել է, ապա հունիսի 19-ին Ազգային ժողովի պատգամավորների քվեարկությամբ զրկվել պատգամավորական անձեռնմխելիությունից ու դատարանի որոշմամբ կալանավորվել: Դեկտեմբերի 21-ին առաջին ատյանի դատարանը Գրիգորյանին գրավի դիմաց ազատ արձակելու որոշում է կայացրել, որը Դատախազությունը բողոքարկել է: