HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

ԼՀԿ-ն առաջարկում է խորհրդարանական վերահսկողություն դեսպանների նշանակման հարցում

Խորհրդարանական «Լուսավոր Հայաստան» խմբակցությունն առաջարկում է ԱԺ կանոնակարգ-օրենքում փոփոխություններ կատարել և ընդլայնել Արտաքին հարաբերությունների մշտական հանձնաժողովի լիազորությունները: Օրենքի նախագիծը շրջանառության է դրվել խորհրդարանի կայքում:

Խմբակցությունն առաջարկում է կանոնակարգ-օրենքի 12-րդ հոդվածը փոփոխել, ըստ որի` օտարերկրյա պետություններում և միջազգային կազմակերպություններում հավատարմագրված՝ Հայաստանի Հանրապետության դեսպանների և/կամ դիվանագիտական ներկայացուցչությունների ղեկավարների հետ, նրանց առաջադրվելուց հետո՝ մինչև նշանակվելը, կազմակերպում է հանդիպում հանձնաժողովի անդամների հետ:

Առաջարկվում է նաև գործունեության ոլորտներին վերաբերող հարցերով օտարերկրյա պետություններում և միջազգային կազմակերպություններում հավատարմագրված դեսպանների և/կամ դիվանագիտական ներկայացուցչությունների ղեկավարների հետ հանձնաժողովում կազմակերպել համատեղ հանդիպումներ: Առաջարկում նշվում է, որ նախատեսված հանդիպումներն իրականացվում են դռնբաց ընթացակարգով՝ բացառությամբ այն դեպքերի, երբ հանձնաժողովն իր անդամների ձայների մեծամասնությամբ որոշում է կայացնում հանդիպումը դռնփակ ընթացակարգով անցկացնել:

Հիշեցնենք, որ հանձնաժողովի նախագահի ընտրության ելույթների ժամանակ բանավեճ սկսվեց ԼՀԿ-ական և ԲՀԿ-ական պատգամավորների միջև, երբ ԼՀ խմբակցության պատգամավոր Արման Բաբաջանյանը, քննադատելով նախորդ իշխանություններին դեսպանների նշանակման հարցում, հիշատակել էր Ուկրաինայում ՀՀ նախկին դեսպան Անդրանիկ Մանուկյանին, որը ԲՀԿ նախագահ Գագիկ Ծառուկյանի խնամին է:

Մշտական հանձնաժողովն իր իրավասության շրջանակում իրականացնում է գլխադասային հանձնաժողովի լիազորությունները, խորհրդարանական վերահսկողություն, պաշտոններում ընտրության կամ նշանակման համար Ազգային ժողովին առաջարկում է թեկնածուներ, կարող է հարցումներով դիմել պետական և տեղական ինքնակառավարման մարմիններին ու պաշտոնատար անձանց, կարող է հրավիրել խորհրդարանական լսումներ, ստեղծել ենթահանձնաժողովներ և աշխատանքային խմբեր:

Լուսանկարում՝ «Լուսավոր Հայաստան» խմբակցության ղեկավար Էդմոն Մարուքյանն է

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։