Կառավարությունը մերժել է «Լուսավոր Հայաստան» խմբակցության օրենսդրական նախաձեռնությունը՝ խորհրդարանական վերահսկողություն իրականացնել դիվանագետների նշանակման հարցում: Այս մասին տեղեկանում ենք կառավարության վաղվա նիստի օրակարգից: Արտաքին գործերի նախարարությունը մերժել է ընդդիմադիր խմբակցության առաջարկությունը մի քանի պատճառներով: Նախարարության ներկայացրած եզրակացության մեջ հղում է արվում «Դիվանագիտական ծառայության մասին» օրենքին, ըստ որի` դիվանագիտական ներկայացուցչին նշանակում և հետ է կանչում hանրապետության նա­խա­գահը՝ վարչապետի առաջարկությամբ, ինչը բխում է Սահ­մա­նադրության պահանջներից, և չի նախատեսում ընթացակարգային կամ քննարկման այլ փուլ, քան վարչապետի կողմից նախագահին առաջարկություն ներկա­յաց­նելը։

«Ուստի՝ դիվանագիտական ներկայացուցիչների նշանակման գործընթացում խորհրդարանի ներգրավվածության օրենսդրական պահանջի գաղափարը կարող է քննարկվել միայն սահմա­նա­դրական փոփոխությունների և իշխանության ճյուղերի լիազորությունների տրամաբանության փոխակերպման համատեքստում»,- ասված է եզրակացության մեջ:

ԱԳՆ-ից հիշեցնում են նաև, որ դիվանագիտական ներկայացուցիչների նշա­նակման գործընթացին խորհրդարանի մասնակցությունը կարող է որպես հակակշռող և զսպող գործոն կիրառվել նախագահական կառավարման ձև ունեցող այն հանրապետու­թյուն­ներում, որտեղ միանձնյա նշանակողը (նախագահը կամ նախագահի կողմից նշանակված վարչա­պե­տը) և նշանակումը հաստատողը՝ խորհրդարանը ձևավորվում են միմ­յանցից անկախ ընտրա­կարգերով և մեկը մյուսի իշխանության աղբյուր չեն հանդիսանում։

«Գործադիր իշխանության կադրային քաղաքականության իրականացման խորհրդարանական հակակշռման և զսպման մե­խա­նիզմի առկայությունն արդարացված չէ այն պարագայում, երբ գոր­ծադիր իշխանության ձևա­վոր­ման և դրա ղեկավարի ընտրության իրավունքն ինքնին պատ­կա­նում է բացառապես խորհրդարանին»,- նշվում է ԱԳՆ եզրակացության մեջ:

Հիշեցնենք, որ «Լուսավոր Հայաստանը» առաջարկում էր փոփոխություն ԱԺ կանոնակարգ-օրենքում, ըստ որի` օտարերկրյա պետություններում և միջազգային կազմակերպություններում հավատարմագրված՝ Հայաստանի Հանրապետության դեսպանների և/կամ դիվանագիտական ներկայացուցչությունների ղեկավարների հետ, նրանց առաջադրվելուց հետո՝ մինչև նշանակվելը, ԱԺ արտաքին հարաբերությունների հանձնաժողովը կազմակերպում է հանդիպում վերջիններիս հետ:

Առաջարկվում էր նաև գործունեության ոլորտներին վերաբերող հարցերով օտարերկրյա պետություններում և միջազգային կազմակերպություններում հավատարմագրված դեսպանների և/կամ դիվանագիտական ներկայացուցչությունների ղեկավարների հետ հանձնաժողովում կազմակերպել համատեղ հանդիպումներ:

Մեր հարցին ի պատասխան` ԱԺ արտաքին հարաբերությունների հանձնաժողովի նախագահ Ռուբեն Ռուբինյանը ասել էր, որ դեմ չէ ԼՀԿ-ի ներկայացրած նախագծին, միակ մտահոգությունն այն է, որ նախագիծը համապատասխանի Սահմանադրությանը: