Երևանի ընդհանուր իրավասության դատարանն ուրբաթ օրը վճռել է «Երևանի թիվ 1 տուն-ինտերնատ»-ի նախկին տնօրեն Վահան Զուրաբյանի հայցն ընդդեմ աշխատանքի և սոցիալական հարցերի նախարարության՝ ի դեմս նախարար Մանե Թանդիլյանի և «Երևանի թիվ 1 տուն-ինտերնատ» ՊՈԱԿ-ի, բավարարել:

Մասնավորապես՝ դատարանը վճռել է անվավեր ճանաչել Զուրաբյանին աշխատանքից ազատելու հրամանը և նրան վերականգնել նախկին աշխատանքում։ Նշենք, որ Զուրաբյանն աշխատանքից ազատվել է 2018 թվականի հոկտեմբերի 5-ին՝ Մանե Թանդիլյանի հրամանով:

Բացի այդ, «Երևանի թիվ 1 տուն-ինտերնատ» ՊՈԱԿ-ը պարտավոր կլինի հարկադիր պարապուրդի ամբողջ ժամանակահատվածի համար Վահան Զուրաբյանին վճարել հատուցում նրա միջին աշխատավարձի չափով` սկսած 2018 թվականի հոկտեմբերի 5-ից՝ մինչև աշխատանքում փաստացի վերականգնելու օրը։ 

Ըստ վճռի, «Երևանի թիվ 1 տուն-ինտերնատ» ՊՈԱԿ-ից հօգուտ Վահան Զուրաբյանի պետք է բռնագանձվի 150.000 դրամ` փաստաբանի վարձատրության գումար։ 

Նշենք, որ աշխատանքի եւ սոցիալական հարցերի նախկին նախարար Մանե Թանդիլյանը Վահան Զուրաբյանին պաշտոնից հեռացրեց պարտականությունների ոչ լիարժեք կատարման, մանկական խնամակալական կազմակերպությունների շրջանավարտների և սոցիալապես անապահով հատուկ խմբերի համար նախատեսված սոցիալական բնակարանների ոչ նպատակային օգտագործման, աշխատողի նկատմամբ վստահության բացակայության պատճառով: Ուսումնասիրության արդյունքում աշխատանքային հանձնաժողովը բացահայտել էր բազմաթիվ չարաշահումներ. վարձով տրված և չբնակեցված բնակարաններ Թբիլիսյան խճուղի 3 հասցեում գտնվող (այս հասցեում է գտնվում «Հանգրվան» անվասայլակների տրամադրման գրասենյակը, հեղ.) սոցիալական բնակարանային շենքում:

Նախարարի այդ որոշումից հետո Վահան Զուրաբյանը դատական հայց ներկայացրեց ընդդեմ աշխատանքի և սոցիալական հարցերի նախարար Մանե Թանդիլյանի և «Երևանի թիվ 1 տուն-ինտերնատ» ՊՈԱԿ-ի՝ իրեն աշխատանքից ազատելու հրամանն անվավեր ճանաչելու, նախկին աշխատանքում վերականգնելու և հարկադիր պարապուրդ վճարելու պահանջով, որն էլ դատարանը բավարարեց:

Հիշեցնենք, որ «Հետք»-ն անդրադարձել էր Հայաստանի տուն-ինտերնատներում, այդ թվում՝ «Երևանի թիվ 1 տուն-ինտերնատ»-ում կատարված չարաշահումներին, հարուցված քրեական գործերին: