Նախկին իշխանություններից ոմանք հեղափոխությունից որոշ ժամանակ առաջ Ազգային անվտանգության ծառայության նյութեր են ոչնչացրել։ Այս մասին իր հրավիրած ասուլիսում հայտարարեց վարչապետ Նիկոլ Փաշինյանը։

«ԱԱԾ-ում արդեն մի քանի ամիս ծառայողական քննություն է ընթանում, որովհետև նախորդ իշխանությունները, ըստ ծառայողական նյութերի, հեղափոխությունից որոշ ժամանակ առաջ ԱԱԾ նյութեր են ոչնչացրել»,- ասաց նա:

Թեեւ իրավաբան չէ, բայց ըստ իր քաղաքական գնահատականի` դա հանցագործություն է, որովհետև այդ նյութերը նրանց սեփականությունը չէին: «էդտեղ կարող էին նյութեր լինել բազմաթիվ բաների մասին։ Հարցը երկար է ձգվում, որովհետև ուրվական գործ է, բայց շատ լուրջ հետևանքների պետք է բերի»,- ասաց նա։

Դիտարկմանը, թե ԱԱԾ-ն ստուգումներ է իրականացնում բոլոր գերատեսչություններում, սակայն ԱԱԾ-ում ստուգումներ չեն արվում, վարչապետն արձագանքեց, որ ԱԱԾ-ում էլ կարող են ստուգումներ արվել:

«ԱԱԾ-ին բոլորն էլ կարող են վերահսկել»,- ասաց նա։