Երևան քաղաքի ընդհանուր իրավասության դատարանի տարածքն այսօր ավելի մարդաշատ է, քան երեկ: Քիչ անց այստեղ կշարունակվի երկրորդ նախագահ Ռոբերտ Քոչարյանի խափանման միջոցի քննությունը: Եթե երեկ դատարանի դիմաց Քոչարյանի կողմնակիցներն էին, այսօր մեծ թիվ են կազմում Քոչարյանի ազատազրկումը պահանջողները:

«Ազատություն Քոչարյանին», «Ցմահ Քոչարյանին» կոչերը դատարանի բակում հաջորդում են միմյանց: Այս պահին դատարանի դահլիճն արդեն լեփ-լեցուն է: Ոստիկաններն ու դատական կարգադրիչները փորձում են փոքր խմբերով ներս թողնել միայն Քոչարյանի ամենամոտ հարազատներին:

Նշենք, որ երեկ տեղի ունեցած դատական նիստի ընթացքում Քոչարյանի խափանման միջոցի հարցի քննարկմանը կողմերը չեն հասել, նրա պաշտպանները ինքնաբացարկի միջնորդություն են ներկայացրել դատավոր Դավիթ Գրիգորյանին, և քիչ անց կհրապարակվի միջնորդության վերաբերյալ որոշումը: