Քաղաքացիները փակել են Կոտայքի մարզի ընդհանուր իրավասության դատարանի Եղվարդի նստավայրի մուտքը
Եղվարդ համայնքում քաղաքացիները շրջափակել են Կոտայքի մարզի ընդհանուր իրավասության դատարանի մուտքը և թույլ չեն տվել դատարանի աշխատակիցներին մուտք գործել շենք։
Քաղաքացիներն ասում են, որ ակցիան ուղղված է, իրենց բնորոշմամբ, «կաշառակեր դատավորների դեմ»։
Դատարանի շենքի մոտ է նաև Կոտայքի մարզից «Իմ քայլը» դաշինքի ցուցակով պատգամավոր ընտրված Վաղարշակ Հակոբյանը։ «Հետք»-ի հետ զրույցում պատգամավորը նշեց, որ դատարանի մոտ է եկել միայն այն նպատակով, որպեսզի իրավիճակը լարվելու դեպքում լինի իր ընտրողների կողքին։
«Սա նաև փոքրիկ հանդիպում է իմ ընտրողների հետ, զրուցում ենք տարբեր թեմաներից։ Ես ինքս կարծում եմ, որ ժողովրդի, իշխանության, դատավորների կենսագործունեությունը պետք է իրականացվի Սահմանադրությանը համապատասխան։ Այդ տրամաբանությունից ելնելով՝ կարծում եմ, որ ակցիա իրականացնող քաղաքացիները պետք է ամեն տեսակ սադրանքներից և ուղղորդումներից զերծ մնան»,- ասաց Վաղարշակ Հակոբյանը։
Հիշեցնենք՝ նախօրեին վարչապետ Նիկոլ Փաշինյանը կոչ էր արել քաղաքացիներին արգելափակել հանրապետության բոլոր դատարանների մուտքերը, իսկ ինքն անձամբ այսօր՝ ժամը 12։00-ին, հանդես կգա հայտարարությամբ։
Մեկնաբանել