Վերաքննիչ քրեական դատարանում դատավոր Արմեն Դանիելյանի նախագահությամբ մեկնարկեց մեղադրյալ Ռոբերտ Քոչարյանի և մյուսների գործով դատախազության ներկայացրած բողոքների քննությունը:

Ռոբերտ Քոչարյանը մասնակցում է նիստին: Ներկա է նաև նրա ֆրանսիացի փաստաբան Սևակ Թորոսյանը:

Նշենք, որ նիստից դեռ երկու ժամ առաջ դատարանի բակում ի պաշտպանություն և ընդդեմ Ռոբերտ Քոչարյանի բողոքի ակցիա էր իրականացվում, որը այս պահին շարունակվում է:

Դատախազությունը բողոքարկել է Քոչարյանի խափանման միջոց կալանավորումը Արցախի նախկին և ներկա նախագահների անձնական երաշխավորությամբ փոխելու, ինչպես նաև Մարտի 1-ի անջատված մասով գործի վարույթը կասեցնելու, Սահմանադրական դատարան դիմելու առաջին ատյանի դատարանի դատավոր Դավիթ Գրիգորյանի որոշումները:

Հիշեցնենք, որ դատավոր Դավիթ Գրիգորյանը, մայիսի 18-ին քննելով Քոչարյանի խափանման միջոցի հարցը, որոշել էր նրան ազատել կալանքից՝ Արցախի Հանրապետության նախկին և ներկա նախագահներ Արկադի Ղուկասյանի և Բակո Սահակյանի անձնական երաշխավորությամբ:

Դրանից երկու օր անց` մայիսի 20-ին, դատարանը որոշել էր կասեցնել Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործի վարույթն ու այն ուղարկել Սահմանադրական դատարան` պարզելու համար այս գործով կիրառման ենթակա Քրեական օրենսգրքի 300.1-րդ հոդվածի 1-ին մասի և դրա հետ փոխկապակցված ՀՀ քրեական օրենսգրքի 300-րդ հոդվածի 1-ին մասի (մինչև 2009 թվականի մարտի 20-ին ընդունված ՀՕ-53-Ն օրենքի ուժի մեջ գտնվելը գործող խմբագրությամբ) համապատասխանությունը Սահմանադրության պահանջներին:

Վերը նշված երկու որոշումները դատախազությունը բողոքարկել էր Վերաքննիչ դատարան, և դրանք մակագրվել են դատավոր Արմեն Դանիելյանին: