HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Էրիկ Գրիգորյան. «Սևանում ստեղծված իրավիճակը երկար տարիների սխալ կառավարման հետևանք է»

Նախօրեին կառավարության արտահերթ նիստին պետական միջնաժամկետ ծախսերի ծրագրի քննարկման ժամանակ շրջակա միջավայրի նախարարություն հայտ է ներկայացրել Սևանա լճում լրացուցիչ մաքրման աշխատանքներ կատարելու համար: Այս մասին այսօր հրավիրված մամուլի ասուլիսում հայտարարեց շրջակա միջավայրի նախարար Էրիկ Գրիգորյանը:

Նախարարի խոսքով՝ լճի կանաչելու գործընթացները զգալիորեն նվազել են, իսկ ջրի մակարդակը նախորդ տարվա համեմատ 1 սմ ավել է:

«Ջրբացթողնման և ջրահեռացման մասին նշեմ, որ 25 միլիոն խորանարդ մետր ավելի քիչ է վերցվել, քան նախորդ տարի այս օրը, և 5 միլիոն խորանարդ մետրի չափով Արփա-Սևանով մուտք է եղել: Նաև նշեմ, որ Ջրային կոմիտեի ներկայացված հայտից պակաս ջրառ է կատարվում»,- ասաց նախարարը:

Էրիկ Գրիգորյանը իր հետ բերել էր նաև բնապահպանական տեսչության 2012թ. կատարած ստուգումների մասին արձանագրությունը, որից պարզ է դարձել, որ մաքրման աշխատանքները պատշաճ չեն կատարվել: Նախարարն ասաց, որ 2011-2017թթ. Սևանա լճում կատարված մաքրման աշխատանքների մասին ամբողջ տեղեկատվությունը հավաքագրվել է և փոխանցվել դատախազությանը: Էրիկ Գրիգորյանի խոսքով՝ կառավարությունը գնառաջարկ է ներկայացրել այն մասին, թե որքան գումար կկազմի եթե Մարտունի, Վարդենիս և Գավառ քաղաքներում կենսաբանական մաքրման կայաններ տեղադրվեն: Ըստ գնառաջարկի՝ Մարտունու և Վարդենիսի համար տեղադրվող մաքրման կայանների համար առանձին-առանձին կպահանջվի 888 միլիոն դրամ, իսկ Գավառի համար՝ 1 մլրդ 184 մլն դրամ: Նախարարը հստակեցրեց, որ սա Հայաստանում գործող կազմակերպության մատուցած ծառայությունների գումարն է, սակայն տարբերակներ կան նաև այլ երկրներից:

«Հենց այս պահին կատարվում է նաև գետերի մաքրման ուսումնասիրություններ: Հենց հիմա էլ վարչապետի աշխատակազմի հետ ունենք համաձայնություն, որ կհաշվարկվի, թե ինչքան ծախսեր կլինեն, և կդիմենք գումար ստանալու համար: Եթե հնարավորություն լինի մինչև 2020 թվականը Սևանը ամբողջությամբ մաքրել, ապա ֆինանսավորում ստանալու համար կրկին կդիմենք կառավարությանը»,- ասաց շրջակա միջավայրի նախարարը: Էրիկ Գրիգորյանն ասաց, որ աշխատանքներ են տարվում նաև կողակի պաշարները վերականգնելու վերաբերյալ: Ըստ նախարարի՝ Սևանում ստեղծված իրավիճակը երկար տարիների սխալ կառավարման հետևանք է:

«Եթե նույնիսկ մենք ոչինչ չանենք, ավել ջրառ չիրականացնենք, աղտոտման աղբյուրները չավելանան, միևնույնն է՝ բացարձակապես արդեն բավարար չէ: Պետք է կատարել հստակ գործողություններ, քանի որ հավասարակշռությունը խախտված է, սառը շերտը խախտված է»,- նշեց Էրիկ Գրիգորյանը:

Նախարարը նշեց, որ լճերն ունեն երեք կարգավիճակ՝ շատ մաքուր, միջին և ճահճացված, և Սևանա լիճը այժմ ունի միջին կարգավիճակ: Էրիկ Գրիգորյանի խոսքով՝ սառը շերտը այնքանով է կարևոր, որ թույլ չի տալիս ներքևից սնուցվող նյութերին վեր բարձրանան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։