Տավուշի մարզի Ոսկեպար գյուղից մինչ Բաղանիս գյուղ տանող նոր շրջանցիկ ճանապարհ կկառուցվի։

Ճանապարհի կառուցումը կիրականացնի «Լինս» հիմնադրամի ճանապարհաշինական ծրագրերի նախկին տնօրեն Էդվարդ Բեզոյանի ընկերությունը։ Ճանապարհի կառուցման պայմանագիրն արդեն հրապարակված է գնումների հաշվետողվականության Armeps համակարգում։

Ոսկեպարից Բաղանիս տանող նոր շրջանցիկ ճանապարհի կառուցման համար Էդվարդ Բեզոյանին պատկանող «Ճանապարհ» ՍՊԸ-ի հետ Տարածքային կառավարման եւ ենթակառուցվածքների նախարարությունը պայմանագիր է կնքել հուլիսի 8-ին։ Պայմանագրի արժեքը 248 միլիոն դրամ է։

Էդվարդ Բեզոյանը

«Ճանապարհ»-ը ճանապարհաշինական աշխատանքներ իրականացնող խոշոր ընկերություններից է

«Լինս» հիմնադրամի ճանապարհաշինական ծրագրերի նախկին տնօրեն Էդվարդ Բեզոյանի «Ճանապարհ» ընկերությունը ճանապարհաշինական աշխատանքներ իրականացնելու համար Կառավարության հետ տարիներ շարունակ խոշոր պայմանագրեր է կնքել։

Միայն գնումների հաշվետվողականության Armeps համակարգում տեղադրված պայմանագրերի ընդհանուր հանրագումարով «Ճանապարհ» ընկերությունը 2016 թվականից մինչ օրս Կառավարությունից ստացել է 1 միլիարդ 571 միլիոն դրամ։

Դեռ նախորդ տարի անդրադարձել էինք այս ընկերության և Կառավարության 2016-2018 թվականի գործարքներին։ Գնումների պայմանագրերի ուսումնասիրությունից պարզել ենք, որ ընկերությունը միայն 2018 թվականին երեք ճանապարհ նորոգելու համար Կառավարությունից ստացել է 425 միլիոն դրամ։

Իսկ 2017 թվականին ընկերությունը նախարարությունից ստացել էր 777 միլիոն դրամ, որպեսզի հիմնանորոգեր Երևան-Սևան-Իջևան-Ադրբեջանի սահման միջպետական նշանակության ավտոճանապարհը, 2016 թվականին՝ 22,5 միլիոն դրամ ՝ Տաշիր քաղաքի Կրուպսկայայի անվան փողոցի 4 կամուրջների նորոգման համար, 99 միլիոն դրամ էլ՝ մինչ 2020 թվականի դեկտեմբերի 31-ը Դիլիջանի թունելը պահպանելու համար։

Հիշեցնենք, որ Կառավարությունը մի քանի որոշումներով խոշոր գումարներ է հատկացրել միջպետական, հանրապետական ճանապարհների նորոգման համար։ Խոշոր հատկացումը եղել է մայիսի 30-ին։ Գործադիրն այդ որոշմամբ ճանապարհների հիմնանորոգման համար Տրանսպորտի, կապի և տեղեկատվական տեխնոլոգիաների նախարարությանը հատկացրեց 3 միլիարդ 95 միլիոն դրամ։ Սակայն ճանապարհաշինության համար հատկացված գումարները փոխանցվել են Տարածքային կառավարման եւ ենթակառուցվածքների նախարարությանը, քանի որ Կառավարության կառուցվածքի փոփոխության արդյունքում ոլորտը փոխանցվել է այդ նախարարությանը։

Լուսանկարները՝ ընկերության պաշտոնական կայքից