Երեկ «Քաղաքացու որոշում» սոցիալ-դեմոկրոտական կուսակցության գործադիր մարմնի քարտուղար Սուրեն Սահակյանը «Հետքին» հարցազրույց էր տվել, որից հետո նրա կուսակից Գարեգին Միսկարյանը լուսանկար էր հրապարակել վարչապետի հետ հանդիպումից, որին ներկա էր նաեւ Սահակյանը:

-Պարոն Սահակյան, ո՞ւմ նախաձեռնությամբ էր հանդիպումը, եւ ի՞նչ հարցեր քննարկվեցին:

-Պարոն Միսկարյանի հետ հանդիպումը նախատեսված էր վաղուց, իսկ հանդիպմանը վարչապետի արարողակարգի ծառայության կողմից իմ ներկա լինելու խնդրանքը եղել է հանդիպումից մեկ օր առաջ: Հանդիպումը ոչ պաշտոնական էր: Քաղաքական հարցերից հանգամանալից քննարկվել է միայն Ամուլսարի հարցը: Տեղի է ունեցել մտքերի փոխանակում:

-Ի՞նչ եք կարծում՝ կառավարության դիրքորոշման փոփոխություն այդ հարցում սպասելի՞ է առաջիկայում:

-Ես կարծում եմ, որ Ամուլսարը հանք չի դառնալու: Մենք ամեն ինչ անելու ենք դրա համար, եւ կառավարությունը կամա թե ակամա պետք է հաշվի նստի քաղաքացիների իղձերի, ցանկությունների հետ: Որեւէ կառավարության գոյության իմաստը դա է:

-Թեեւ հանդիպումը ոչ պաշտոնական էր, այնուհանդերձ, ի՞նչ տպավորություն ստացաք՝ կառավարությունը պատրա՞ստ է, ինչպես Դուք եք ասում, հաշվի նստել քաղաքացիների ցանկությունների հետ Ամուլսարը հանք չդարձնելու հարցում:

-Մեր խոսակցության ընթացքում վարչապետի դիրքորոշումը եղել է այն, ինչ ինքը բազմաթիվ ելույթների դեպքում հայտնել է լայն հանրությանը: Իսկ քաղաքացիների կամքի հետ հաշվի նստելու պատրաստակամության մասին նա հայտարարել է թե՛ հեղափոխական հրապարակում, թե՛ դրանից հետո անցած մեկ ու կես տարվա համարյա ամեն ելույթում: