HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Բջջային հավելվածով երթևեկության կանոնների խախտման մասին հաղորդում տալու նախագիծը վիճաբանության առիթ դարձավ խորհրդարանում

Յոթերորդ  գումարման Ազգային ժողովի 3-րդ նստաշրջանում քննարկվում է «Տեսանկարահանող կամ լուսանկարահանող սարքերով հայտնաբերված ճանապարհային երթեւեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» օրենքում լրացումներ կատարելու մասին «Իմ քայլը» խմբակցության պատգամավորներ Սիսակ Գաբրիելյանի և Արմեն Փամբուխչյանի ներկայացրած նախագիծը:

Հիմնական զեկուցող Սիսակ Գաբրիելյանի կարծիքով՝ «թավշյա հեղափոխությունից» հետո քաղաքացիները ավելի քան երբևէ պատրաստ են համագործակցել իրավապահ մարմինների հետ և ըստ նրա՝ այս նախագիծն էլ առաջացել է բազմաթիվ քաղաքացիների ցանկությամբ: 

«Այս նախագծով հնարավորություն է տրվում քաղաքացիներին տեսանկարահանել ճանապարհային երթևեկության կանոնների խախտումները և օնլայն ռեժիմով փոխանցել ոստիկանություն: Տեսանյութը արձանագրած քաղաքացու տվյալները գաղտի են լինելու: Տեսանյութը ուղարկելուց հետո քաղաքացին այդ գործընթացում այլևս դերակատարություն չունի»,- ասաց Սիսակ Գաբրիելյանը:

Պատգամավորի խոսքով՝ նախագծում շեշտը դրվել է խախտումը օնլայն ռեժիմով փոխանցելու վրա, քանի որ այդ եղանակով փոխանցելու դեպքում վարչական մարմինը մի շարք հարցերի հստակ պատասխան կարող է տալ, օրինակ՝ իրավախախտման տեղը և ժամանակը:

Ճանապարհային երթևեկության կանոնների խախտման փաստերը փոխանցելու համար կստեղծվի բջջային հավելված, որի համար ըստ Սիսակ Գաբրիելյանի՝ նախատեսված է 30-50 միլիոն դրամ՝ կախված հավելվածի ֆունկցիոնալությունից: Պատգամավորը շեշտեց, որ նախագիծը միայն պատժող գործառույթ չի ունենալու, քանի որ վթար նկարահանելու դեպքում GPS-ի միջոցով միանգամից հայտնի կդառնա դեպքի վայրը, ինչն էլ հնարավորություն կտա շտապ օգնության կամ փրկարար ծառայության մեքենաներին արագորեն մոտենալ:

«Բարգավաճ Հայաստան» խմբակցության պատգամավոր Արթուր Գևորգյանը, ի տարբերություն նախագծի վերաբերյալ հնչած դրական կարծիքների, բացասական արտահայտվեց նախագծի մասին: 

«Հետաքրքիր է, թե ինչի ենք մենք ընկել վարորդների հետևից: Մի հատ բալային համակարգ, խախտում արեց բալ ենք հանում, բացի բալ հանելը տուգանում ենք, հիմա էլ ասում ենք վերցրեք հեռախոսներն ու ընկեք վարորդների հետևից»,- նշեց ԲՀԿ պատգամավորը:

Արթուր Գևորգյանը Սիսակ Գաբրիելյանից հետաքրքրվեց՝ օրինակ՝ եթե վարորդը մեքենան մոտ մեկ ժամ կայանել է հետիոտնային անցման վրա, և տարբեր ժամերի տարբեր քաղաքացիներ տեսանկարահանեցին և ուղարկեցին օպերատիվ կառավարման կենտրոն, ապա դրանք ինչպես են տարանջատվելու միմյանցից: Արձագանքելով ԲՀԿ պատգամավորի հարցին՝ Սիսակ Գաբրիելյանն ասաց.

«Ոստիկանությունում աշխատում են պրոֆեսիոնալ մարդիկ և հնարավոր չէ նույն խախտման համար երկու ակտավորում լինի: Այնտեղ աշխատում են օրենքը կարդացած մարդիկ և հասկանում են, որ մեկ խախտման համար տուգանում են մեկ անգամ»- ասաց իշխող «Իմ քայլը» խմբակցության պատգամավորը:

Նախագծին դեմ արտահայտվեցին նաև «Բարգավաճ Հայաստան» խմբակցության պատգամավորներ Արման Աբովյանն ու Արթուր Դալլաքյանը: Վերջինիս ելույթի ժամանակ դահլիճից արձագանք լսվեց, իսկ ելույթի ավարտից հետո նաև կարճ ծափահարություն, ինչը վրդովվեցրեց Դալլաքյանին և վիճաբանություն սկսվեց: Ի վերջո Բաբկեն Թունյանի ուղեկցությամբ Արթուր Դալլաքյանը լքեց նիստերի դահլիճը:

Ելույթ ունեցավ նաև նախագծի համահեղինակ Արմեն Փամբուխչյանը. «Ես համահեղինակ եմ այս նախագծի նրա համար, որովհետև պատգամավոր լինելով՝ պետք է տեսնեմ, թե որն է օրինական, որն է ի նպաստ օրենքի, ինչը օգուտ կտա երկրին, այլ ոչ թե նստեմ մտածեմ, թե որոշ մշակույթ կրող մարդկանց դա դուր կգա, թե չէ: Կարծում եմ՝ եթե ես սկսեմ մտածել, որ իմ այս կամ այն արարքը գործ տալու մշակույթի մեջ է տեղավորվում, ապա ես միաժամանակ պետք է սկսեմ չընդունել ոչ ոստիկանությունը, ոչ այլ իրավապահ մարմիններին: Այդ պահից կդադարեմ լինել Ազգային ժողովի պատգամավոր: Այս նախագիծը նրա մասին էր, որ քաղաքացին նույնպես ունենա մասնակցություն և իր փոքր լուման ներդնի, որպեսզի Հայաստանում հաստատվի օրինականություն»,- ասաց Փամբուխչյանը:

Իր եզրափակիչ ելույթի վերջում էլ Սիսակ Գաբրիելյանը՝ դիմելով «Բարգավաճ Հայաստան»-ի պատգամավորներին, ասաց հետևյալը. «Եթե խնդիրը արձանագրելը գործ տալ է, ապա հարգելի՛ ընդդիմություն, դուք լավագույն գործ տվողներն եք»:

Հիշեցնենք, որ սեպտեմբերի 4-ին նախագիծն արժանացել էր Ազգային ժողովի պաշտպանության և անվտանգության հարցերի հանձնաժողովի դրական եզրակացությանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։