HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Հակոբ Մկրտչյանը՝ ծանրամարտի աշխարհի չեմպիոն

Թաիլանդի Պատայա քաղաքում ընթացող ծանրամարտի աշխարհի առաջնությունում 89 կգ քաշային կարգում հանդես եկող Հակոբ Մկրտչյանը երկամարտի 375 կգ (167+208) արդյունքով դարձավ աշխարհի չեմպիոն:

Պոկում վարժությունում Հակոբ Մկրտչյանը առաջին մոտեցմամբ կարողացավ իր գլխավերևում պահել 163 կիլոգրամանոց ծանրաձողը: Երկրորդ մոտեցմամբ հայ ծանրորդը բարձրացրեց նաև 167 կգ ծանրաձողը, սակայն երրորդ մոտեցմամբ չկարողացավ բարձրացնել 170 կիլոգրամը և պոկում վարժությունում բավարարվեց 4-րդ տեղով:

Հրում վարժությունում Հակոբ Մկրտչյանը առաջին մոտեցման համար պատվիրել էր 204 կլիոգրամանոց ծանրաձող, որը կարողացավ հաջողությամբ բարձրացնել: Երկրորդ մոտեցմամբ հայ ծանրորդը կարողացավ իր գլխավերևում պահել 208 կիլոգրամը: Եվ քանի որ իրանցի Ալի Միրին անհաջողություն գրանցեց 212 կգ ծանրաձողը բարձրացնելիս, Հակոբ Մկրտչյանը, առանց երրորդ մոտեցումը կատարելու, հռչակվեց աշխարհի չեմպիոն:

Հարկ է նշել, որ հրում վարժությունում Հակոբ Մկրտչյանը փոքր արծաթ նվաճեց, քանի որ B խմբում ճապոնացի Տոշիկի Յամամոտոն ավելի շուտ էր բարձրացրել 208 կիլոգրամանոց ծանրաձողը։ Ինչևէ, դա չխանգարեց հայ ծանրորդին դառնալ աշխարհի չեմպիոն: Իրանցի Ալի Միրին հռչակվեց փոխչեմպիոն, իսկ վրացի Ռևազ Դավիտաձեն՝ բրոնզե մեդալակիր:

89 կգ քաշային կարգում էր հանդես գալիս նաև Եվրոպայի 2019թ. առաջնության բրոնզե մեդալակիր Դավիթ Հովհաննիսյանը, որին երկամարտի 355 կգ արդյունքով չհաջողվեց մրցանակային տեղ գրավել:

Հիշեցնենք, որ 22-ամյա Հակոբ Մկրտչյանը 2019թ. ապրիլին հաղթել էր նաև Եվրոպայի առաջնությունում: Բացի այդ, գյումրեցի ծանրորդը 2014թ. պատանեկան Օլիմպիական խաղերի և 2018թ. Եվրոպայի մինչև 23 տարեկանների չեմպիոն է:

Աշխարհի ընթացիկ առաջնությունում Հակոբ Մկրտչյանը ծանրամարտի Հայաստանի հավաքականի առաջին ներկայացուցիչն էր, որը մրցանակային տեղ գրավեց երկամարտի արդյունքներով: Մինչև այդ, 81 կգ քաշային Անդրանիկ Կարապետյանը պոկում վարժությունում փոքր բրոնզե մեդալի էր արժանացել:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։