HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Պաշտպան. «Նուբարաշենում տեղի ունեցած միջադեպի գործով միակ մեղադրյալը Սեդրակ Օսիպյանն է, մյուսների նկատմամբ հետապնդումը դադարեցվել է»

Նախկին ոստիկանապետ Վալերիյ Օսիպյանի եղբորորդու` Սեդրակ Օսիպյանի մասնակցութամբ քրեական գործով անցնող Սարգիս Հովհաննիսյանի, եղբայրներ Վանուշ և Վիգեն Ալեքսանյանների նկատմամբ քրեական հետապնդումը դադարեցվել է։ Գործով այս պահին մեղադրյալի կարգավիճակ ունի միայն Սեդրակ Օսիպյանը: Այս մասին «Հետքի» հետ զրույցում ասաց Սարգիս Հովհաննիսյանի պաշտպան Լուսինե Վիրաբյանը:

Հիշեցնենք, որ 2014 թվականի հունիս ամսին Նուբարաշենում Օսիպյանի եղբորորդու մասնակցությամբ միջադեպ է տեղի ունեցել, որի հետևանքով դանակահարվել է Վանուշ Ալեքսանյանը: Բժիշկները ստիպված են եղել հեռացնել հիվանդանոց տեղափոխված Ալեքսանյանի փայծաղը:

Ոստիկանությունը տեղի ունեցած միջադեպի մասին հայտնել էր երեք օր անց, Սեդրակ Օսիպյանը գործով ներգրավվել էր որպես մեղադրյալ, և նրա նկատմամբ հետախուզում էր հայտարարվել: Օսիպյանի եղբորորդին իրավապահներին ներկայացել էր միայն այն բանից հետո, երբ նրա նկատմամբ ազատազրկման հետ չկապված խափանման միջոց էր ընտրվել:

Այն բանից հետո, երբ արդեն հայտնի էր դարձել վերը նշված միջադեպի մասին, քաղաքացի Սուսաննա Հովհաննիսյանը բարձրաձայնել էր, որ 2014-ին Երևանի փոխոստիկանապետի պաշտոնը զբաղեցնող Վալերիյ Օսիպյանը փորձել է համոզել, որպեսզի որդին՝ Սարգիս Հովհաննիսյանը, իր վրա վերցնի դանակահարությունը: Վալերիյ Օսիպյանի վերաբերյալ մամուլում արված հայտարարության հիման վրա քրեական գործ էր հարուցվել, որը հետագայում կարճվել է: 2015 թվականի սեպտեմբերի 11-ին կասեցվել էր նաև դանակահարության առթիվ հարուցված քրեական գործի վարույթն այն հիմքով, թե «հայտնի չէ անձը, որ գործով պետք է ներգրավվի որպես մեղադրյալ»:

2018 թվականին, այն ժամանակահատվածում, երբ Վալերիյ Օսիպյանը ոստիկանապետ էր, քրեական գործի վարույթը վերսկսվել է: Գործով մեղադրյալի կարգավիճակ էին ստացել չորս անձինք` Սեդրակ Օսիպյանը, Սարգիս Հովհաննիսյանը, Վիգեն և Վանուշ Ալեքսանյանները: Օսիպյանի, Վանուշ և Վիգեն Ալեքսանյանների նկատմամբ խափանման միջոց  էր ընտրվել չհեռանալու մասին ստորագրությունը, իսկ Սարգիս Հովհաննիսյանի նկատմամբ հայտարարվել էր հետախուզում և խափանման միջոց ընտրվել կալանավորումը: Այժմ Հովհաննիսյանի կալանավորման որոշումը ևս վերացվել է:

 

Լուսանկարում՝ փաստաբան Լուսինե Վիրաբյանը

Լուսանկարը՝  Iravaban.net-ի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։