Երևան քաղաքի ընդհանուր իրավասության դատարանը՝ նախագահությամբ դատավոր Տաթևիկ Գրիգորյանի, քիչ առաջ հեռացավ խորհրդակցական սենյակ՝ կաշառք ստանալու մեջ մեղադրվող դատավոր Գագիկ Հեբոյանի և կաշառքի օժանդակության մեջ մեղադրվող փաստաբան Վահագն Դանիելյանի գործով դատավճիռ կայացնելու:

Մինչ այդ ամբաստանյալները վերջին խոսք ասացին: Դատավոր Հեբոյանը կարծիք հայտնեց, որ գործի քննության ընթացքում իրեն առաջադրված մեղադրանքը չի հիմնավորվել:

«Գործն ի սկզբանե սարքված էր դատական իշխանության դեմ սանձազերծված վեթինգ ասեմ, ճնշում ասեմ...պետք է լիներ կաշառակեր դատավոր, որ այս ամեն ինչը սկսեին: Վարչապետը խորհրդարանի բարձր ամբիոնից հայտարարեց, թե դատավոր ենք ձերբակալել կաշառքով, այսինքն՝ միանգամից և՛  նախաքննություն արեց, և՛ դատաքննություն»,- ասաց Գագիկ Հեբոյանը: Վերջինս նշեց, որ ինքն ի սկզբանե ասել է, և հիմա էլ պնդում է, որ կաշառք չի պահանջել, դրա գնի շուրջ, որևէ սակարկություն չի արել:

Հեբոյանն ընդգծեց, որ դատարանում ցուցմունք են տվել 11 անձինք և նրանցից միայն մեկը՝ Բենիկ Հարությունյանն է իր դեմ վկայություն տվել, իսկ մյուս 10 անձանց ցուցմունքներով Հարությունյանի ցուցմունքը հերքվել է: Ըստ Հեբոյանի՝ Հարությունյանի ցուցմունքն արժանահավատ լինել չի կարող, քանի որ նա շահագրգիռ անձ է: Դատավորը նշեց, որ մինչ այս գործը իր կայացրած մեկ այլ վճռի արդյունքում Բենիկ Հարությունյանը զրկվել է ժառանգական գույքից և իր նկատմամբ թշնամական վերաբերմունք ունի:

Փաստաբան Վահագն Դանիելյանն ասաց, որ ինքը կաշառքի օժանդակություն, որևէ անօրինական գործողություն չի կատարել և կաշառքի օժանդակության վերաբերյալ որևէ անձի հետ պայմանավորվածություն ձեռք չի բերել: Ըստ Վահագն Դանիելյանի՝ իր ասածն ապացուցվում է նաև գործի շրջանակներում իրականացված օպերատիվ հետախուզական միջոցառման շրջանակներում ձեռք բերված տեսաձայնագրություններով:

Հիշեցնենք, որ Գագիկ Հեբոյանին մեղադրանք է առաջադրվել այն բանի համար, որ նա, զբաղեցնելով Կոտայքի մարզի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ՝ Բենիկ Հարությունյանի օգտին իր լիազորությունների շրջանակում գործողություն կատարելու համար 2019 թվականի մարտի 6-ին նրանից անձամբ պահանջել և 2019թ. մարտի 27-ին Փաստաբանների պալատի փաստաբան Վահագն Դանիելյանի օժանդակությամբ ստացել է առանձնապես խոշոր չափերի կաշառք:

Վահագն Դանիելյանին մեղադրանք է առաջադրվել այն բանի համար, որ նա, հանդիսանալով փաստաբանների պալատի փաստաբան, խոչընդոտներ վերացնելու և հանցավոր ճանապարհով ձեռք բերված միջոցները թաքցնելու եղանակով օժանդակել է Կոտայքի մարզի ընդհանուր իրավասության դատարանի դատավոր Գագիկ Հեբոյանի կողմից առանձնապես խոշոր չափերի կաշառք ստանալուն:

Ըստ մեղադրանքի՝ դատավորը քաղաքացուն 3 580 000 դրամ պետական տուրքը վճարելուց ազատելու դիմաց պահանջել է 1 714 160 դրամին համարժեք 3500 դոլար կաշառք, սակայն սակարկելու արդյունքում Գագիկ Հեբոյանը քաղաքացու հետ վերջնական պայմանավորվածություն է ձեռք բերել հիշյալ գործողությունը կատարելու դիմաց 1 224 400 դրամին համարժեք 2500 դոլար կաշառք ստանալու վերաբերյալ:

Ըստ մեղադրանքի՝ խուսափելով կաշառքի առարկան անձամբ վերցնելուց և բացահայտվելուց` դատավորը դիմել է իր ծանոթ փաստաբանի` Վահագն Դանիելյանի օգնությանը. 2019թ. մարտի 27-ին հիշյալ քաղաքացին ԱԱԾ-ի իրականացրած օպերատիվ-հետախուզական միջոցառման շրջանակներում 2500 դոլար կաշառքի գումարը տվել է փաստաբանին, որը նույն օրը այն փոխանցել է դատավորին:

Գագիկ Հեբոյանը ձերբակալվել էր մարտի 27-ին, դատախազը նրա նկատմամբ քրեական հետապնդում հարուցելու և նրան ազատությունից զրկելու համաձայնություն տալու վերաբերյալ միջնորդություն էր ներկայացրել Բարձրագույն դատական խորհուրդ (ԲԴԽ), որը բավարարվել էր: Դրանից հետո դատավորին մեղադրանք է առաջադրվել, և նա դատարանի որոշմամբ կալանավորվել էր: Այս պահին դատավոր Գագիկ Հեբոյանի լիազորությունները ԲԴԽ-ի որոշմամբ կասեցված են մինչև վերջինիս նկատմամբ հարուցված քրեական գործով վարույթի ավարտը: Վահագն Դանիելյանի նկատմամբ գրավ է կիրառվել:

Մեղադրական ճառ ասելիս դատախազ Արթուր Չախոյանը Գագիկ Հեբոյանի համար՝ 9, իսկ Վահագն Դանիելյանի համար 7 տարի ժամկետով ազատազրկում է պահանջել:

Դատավոր Տաթևիկ Գրիգորյանը գործով դատավճիռը կհրապարակի նոյեմբերի 20-ին:

Ամբաստանյալներն առարկել են տեսանկարահանման դեմ:

Լուսանկարում՝ գործը քննող դատավոր Տաթևիկ Գրիգորյանը