Աժդահակ լեռան (Կարմիր սար գագաթ) խառնարային լճից ջրառ իրականացնելու մասին ահազանգից հետո Բնապահպանության և ընդերքի տեսչական մարմինը (ԲԸՏՄ) դիմել էր ոստիկանություն՝ ջրառ իրականացրած անձի ինքնությունը պարզելու նպատակով: «Հետք»-ի հետ զրույցում տեսչական մարմնի իրազեկման և հանրության հետ տարվող աշխատանքների բաժնի պետ Նաիրա Աղաբաբյանը հայտնեց, որ ոստիկանությունն արդեն գտել է այդ անձին, իսկ տեսչությունը իրականացնում է վարչական վարույթ, որի արդյունքները, ըստ ԲԸՏՄ-ի, հայտնի կդառնա 10 օր անց: Այլ մանրամասներ տեսչական մարմինը չհաղորդեց:

• Աժդահակ լեռան խառնարանային լճից խողովակներով ջուր են դուրս բերում. ահազանգ՝ լճի անապատացման վտանգի մասին

Հիշեցնենք, որ հոկտեմբեր մասին «Ժողովրդավարական համախմբում» նախաձեռնությունը իր ֆեյսբուքյան էջում ահազանգել էր, որ Գեղամա լեռներում անասնապահությամբ զբաղվող որոշ գյուղատնտեսներ 2018 թվականից մոտ 5 կմ երկարությամբ խողովակաշարի միջոցով Աժդահակ լեռան Կարմիր սար գագաթի խառանարային լճի ջուրը օգտագործում են անասուններին ջրով ապահովելու և սեփական կարիքների համար, ինչը կարող է հանգեցնել լճի անապատացմանը, որն իր հերթին կխախտի տեղանքի էկոհամակարգը: Հայտարարությանը կցվել էին նաև խողովակների առկայությունը փաստող, ինչպես նաև նախկին ու ներկա վիճակները պատկերող լուսանկարներ:

Բնապահպանության և ընդերքի տեսչական մարմնի ղեկավարը հանձնարարել էր տեղում ուսումնասիրություններ անցկացնել: Այսօր տեսչության իրազեկման և հանրության հետ տարվող աշխատանքների բաժնի պետ Նաիրա Աղաբաբյանը մեզ հայտնեց, որ երբ տեսուչներն այցելել են լեռան տարածք, այնտեղ ջրառ չի իրականացվել: