Էդմոն Մարուքյանին սպառնալու փաստով քրեական գործ է հարուցվել
«Լուսավոր Հայաստան» խմբակցության ղեկավար Էդմոն Մարուքյանին սպառնալու փաստով ոստիկանությունը քրեական գործ է հարուցել Քրեական օրենսգրքի 137 հոդվածի 1-ին մասի հատկանիշներով:
Այս մասին «Հետքին» հայտնեց գլխավոր դատախազության հանրային կապերի վարչության պետ Արևիկ Խաչատրյանը:
Ըստ այդ հոդվածի՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել, պատժվում է տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
Փետրվարի 11-ին խորհրդարանում հրավիրված ասուլիսին Էդմոն Մարուքյանը հայտարարել էր իր հասցեին հնչած սպառնալիքների մասին:
«Զգուշացնում եմ, այ գյադա, շուտով գնդակները որոտալու են, նայի` չդիպչի»,-սպառնալիքներից մի հատված էր ընթերցել Մարուքյանը, ապա հայտնել, որ դիմել է գլխավոր դատախազություն:
Գլխավոր դատախազությունը պատգամավորի գրությունն ուղարկել էր ոստիկանության քրեական ոստիկանության գլխավոր վարչություն (6-րդ վարչություն)՝ որպես հանցագործության մասին հաղորդում:
Մեկնաբանել