Խորհրդարանում շարունակվում են «Դատական օրենսգիրք» սահմանադրական օրենքում փոփոխություններ կատարելու թեմայով խորհրդարանական լսումները:

Ազգային անվտանգության ծառայության աշխատակից Վահե Ենգիբարյանն անդրադարձավ արդարադատության նախարար Ռուստամ Բադասյանի ելույթին:

Հիշեցնենք՝ Բադասյանը հայտնել էր, որ առաջարկվող նախագծով օպերատիվ-հետախուզական միջոցառումներ իրականացնելու թույլտվություն տալը վերապահվում է Երևան քաղաքի առաջին ատյանի ընդհանուր իրավասության դատարանի քրեական մասնագիտացմամբ բոլոր դատավորներին:

Ենգիբարյանը հետաքրքրվեց՝ արդյոք նման դատավորները ծառայողական ու պետական գաղտնիքի կրո՞ղ են համարվելու:

«Եվ քանի որ այդ միջնորդությունները բողոքարկման ենթակա են, արդյոք կարիք չկա՞ նման իրավունք վերապահել նաև Վերաքննիչ և Վճռաբեկ դատարանների քրեական մասնագիտացմամբ դատավորներին»,- հարցրեց Ենգիբարյանը:

Արդարադատության նախարար Ռուստամ Բադասյանն արձագանքեց` նախարարությունում արդեն իսկ նոր նախագիծ է մշակվում «Պետական և ծառայողական գաղտնիքի մասին» օրենքում փոփոխություն կատարելու վերաբերյալ, որպեսզի նման դատավորները ևս պետական և ծառայողական գաղտնիքին հասանելիություն ստանան:

Ինչ վերաբերում է Վճռաբեկ և Վերաքննիչ դատարանների քրեական մասնագիտացմամբ դատավորներին ևս նման լիազորությամբ օժտելուն՝ նախարարի արձագանքը դրական էր: