Հայտնի է Չինաստանում տեղի ունեցած կարանտինային հյուրանոցի փլուզման զոհերի նախնական թիվը
Չինաստանի Ցյուանչժոու քաղաքում մարտի 7-ին փլուզվել է հինգհարկանի «Xinjia Express Hotel» հյուրանոցը, որի արդյունքում փլատարկների տակ է մնացել շուրջ 71 մարդ։ Մարտի 8-ի կեսօրի դրությամբ հայտնի է, որ փլուզման արդյունքում զոհերի նախնական թիվը հասել է 10-ի։ Այդ մասին հայտնում է «China Xinhua News» անգլալեզու պետական պարբերականը՝ հղում կատարելով Չինաստանի արտակարգ իրավիճակներով հարցերով նախարարությանը։
Latest: Death toll has risen to 10 as of 4:00 p.m. Sunday after a hotel building collapsed in east China's Fujian Province Saturday evening https://t.co/vZdHKrnCfS pic.twitter.com/aaJoXbNOoQ
— China Xinhua News (@XHNews) March 8, 2020
Փրկարարները փլատակների տակից կարողացել են հանել 49 մարդու, կան անհետ կորածներ։ Փրկարարական աշխատանքները շարունակվում են մինչ այս պահը։ Փլուզման պահին հյուրանոցում եղել է 71 մարդ, որոնցից 58-ը եղել են կարանտինի մեջ։ Փլուզումը տեղի է ունեցել շաբաթ օրը՝ մարտի 7-ին, տեղի ժամանակով 19։30-ին (Երևանի ժամանակով 15։30-ին)։ Հյուրանոցը կառուցվել էր 2018 թվականին և ուներ 80 համար։ Մարտի 7-ից փրկարարական աշխատանքներին մասնակցում են շուրջ 150 փրկարարներ։ Աշխատանքներին ներգրավված են 36 միավոր հատուկ տեխնիկա, շտապ օգնության 15 մեքենաներ, 67 հրշեջ մեքենաներ։
Ինչպես հայտնում է «Սինհուա» պետական գործակալությունը, չինական նոր տարվա սկզբից, հյուրանոցի առաջին հարկում տեղի էին ունենում շինարարական աշխատանքներ։ Ոստիկանությունն արդեն հարցաքննության է կանչել հյուրանոցի սեփականատիրոջը։ «Beijing News» պարբերականը մեջբերում է մի կնոջ խոսքեր, որի բարեկամները գտնվում էին հյուրանոցում․
«Ես չեմ կարողանում կապ հաստատել նրանց հետ, նրանք չեն պատասխանում իմ զանգերին։ Ես նույնպես կարանտինի մեջ եմ (մեկ այլ հյուրանոցում) և շատ եմ անհանգստանում։ Ես չգիտեմ՝ ինչ անել։ Նրանք առողջ էին, ամեն օր չափում էին նրանց ջերմությունը, և թեստերը ցույց էին տալիս, որ ամեն բան կարգին է»։
Ուրբաթ օրվա տվյալներով՝ Ֆուցզյան նահանգում, ընդհանուր առմամբ, գրանցվել է կորոնավիրուսով վարակման 296 դեպք, իսկ շուրջ 11 000 մարդ անմիջական հսկողության տակ է, քանի որ շփվել են վարակակիրների հետ։
Վերջին տվյալներով՝ կորոնավիրուսի վարակակիրների թիվը հասել է 107 309-ի, մահացածների թիվը՝ 3652-ի, իսկ ապաքինվածների թիվը՝ 60910-ի։
Լուսանկարը՝ «Associated Press» գործակալության
Մեկնաբանել