«Հ2» հեռուստաընկերության սեփականատեր Սամվել Մայրապետյանի նկատմամբ խափանման միջոց ընտրվեց կալանավորումը:

Երևան քաղաքի ընդհանուր իրավասության դատարանը՝ նախագահությամբ դատավոր Արտուշ Գաբրիելյանի, քիչ առաջ հրապարակեց վերը նշված որոշումը: Այս մասին «Հետքի» հետ զրույցում ասաց Մայրապետյանի պաշտպաններից Լուսինե Սահակյանը՝ ակնհայտ ապօրինի որակելով այս որոշումը:

Նշենք, որ կաշառք տալուն օժանդակելու մեջ մեղադրվող Մայրապետյանի նկատմամբ նախկինում ընտրված խափանման միջոց անձնական երաշխավորությունը վերացվել է օրեր առաջ: Ըստ ՀՔԾ-ի՝ Մայրապետյանը խախտել է այս խափանման միջոցի պայմանն ու խուսափել վարույթն իրականացնող մարմնի կանչով ներկայանալուց:

Նման պայմաններում Մայրապետյանի նկատմամբ հետախուզում էր հայտարարվել և նրան կալանավորելու միջնորդություն ներկայացվել դատարան, որը, փաստորեն, բավարարվել է:

Մայրապետյանին բուժման նպատակով երկրից թույլատրվել էր դուրս գալ 2019-ի հունվարի 25-ին։ Նրա համար անձնական երաշխավորություն էին տվել Առողջապահության նախարարության գլխավոր նյարդավիրաբույժ Ռուբեն Ֆանարջյանը և Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը՝ յուրաքանչյուրը վճարելով 15 մլն դրամ։

Վերջիններս ՀՔԾ-ում հարցաքննվել են ու հայտնել, որ չեն կարող ապահովել Մայրապետյանի ներկայանալը վարույթն իրականացնող մարմին։