ՈՒԵՖԱ-ն հետաձգել է Չեմպիոնների լիգայի և Եվրոպա լիգայի խաղարկությունները
Եվրոպայում կորոնավիրուսի տարածման պատճառով՝ Եվրոպական ֆուտբոլային ասոցիացիաների միությունը (The Union of European Football Associations, ՈՒԵՖԱ) հետաձգել է Չեմպիոնների լիգայի և Եվրոպա լիգայի հաջորդ շաբաթ նախատեսված խաղերը: Այս մասին ասվում է կազմակերպության տարածած պաշտոնական հաղորդագրության մեջ:
Այսպիսով, մարտի 17-ին և 18-ին չեն կայանա Չեմպիոնների լիգայի գավաթի խաղարկության 1/8 եզրափակչի պատասխան հանդիպումները, ինչպես նաև մարտի 19-ին նախատեսված Եվրոպա լիգայի 1/8 եզրափակչի պատասխան խաղերը: Հետաձգվել է նաև մարտի 20-ի վիճակահանությունը:
ՈՒԵՖԱ-ն ընդգծում է, որ նշված հանդիպումների ժամանակացույցի մասին տեղեկությունը կհայտնի ավելի ուշ:
«Երեկ Եվրոպական ֆուտբոլային միությունը հրավիրել է 55 ազգային ասոցիացիաների ներկայացուցիչներին, Եվրոպական ակումբների ասոցիացիաների ղեկավարությանը, եվրոպական լիգաների, ինչպես նաև FIFPro-ի ներկայացուցիչներին մասնակցելու համատեղ տեսակոնֆերանսին, որպեսզի քննարկվի ստեղծված իրավիճակը: Հանդիպումը նախատեսում է անցկացնել մարտի 17-ին»,- ասվում է ՈՒԵՖԱ-ի հաղորդագրությունում:
Հիշեցնենք, որ ավելի վաղ եվրոպական մի շարք լիգաներ ներքին առաջնությունների խաղերը հետաձգելու որոշումներ էին կայացրել, որոնց թվում նաև այնպիսի ուժեղագույն լիգաներ, ինչպիսիք են Իսպանիայի, Իտալիայի, Անգլիայի, Ֆրանսիայի, Պորտուգալիայի, Նիդերլանդների առաջնությունները: Գերմանական Բունդեսլիգան դեռևս համապատասխան որոշում չունի:
Այսօր նաև Հայաստանի ֆուտբոլի ֆեդերացիան էր մինչև մարտի 23-ը հետաձգել իր հովանու ներքո անցկացվող մրցաշարերը:
Հիշեցնենք, որ ֆուտբոլային աշխարհի ներկայացուցիչներից կորոնավիրուսով են վարակվել Լոնդոնի «Արսենալ»-ի գլխավոր մարզիչ Միկել Արտետան, Լոնդոնի «Չելսի»-ի ֆուտբոլիստ Կալում Հադսոն-Օդոին, Թուրինի «Յուվենտուս»-ի պաշտպան Դանիելե Ռուգանին, իտալական մեկ այլ թիմի՝ «Սամպդորիա»-ի հարձակվող Մանոլո Գաբյադինին, գերմանական «Հանովեր»-ի խաղացողներ Տիմո Հյուբերսն ու Յանես-Կիլիան Հորնը:
Մեկնաբանել