Տեսանյութեր
Լուսանկարներ
Կորոնավիրուսի թեստավորում իրականացնելու համար Արցախից փորձանմուշներն ուղարկվում են Երևան
«Արցախի հիվանդանոցներում կորոնավիրուսի թեստավորում չեն իրականացնում, քանի որ չունեն համապատասխան լաբորատորիա, այդ պատճառով փորձանմուշն ուղարկում ենք Երևան՝ «Նորքի ինֆեկցիոն կլինիկական հիվանդանոց»»,-այս մասին «Հետքի»-ի հետ զրույցում ասաց Արցախի պետական հիգիենիկ և հակահամաճարակային տեսչության պետ Օֆելյա Հարությունյանը։
Տեսչության պետը հայտնեց, որ մեր հարցերի պատասխանները կարող ենք ստանալ Արցախում ձևավորված նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի տեղեկատվական շտաբից:
Տեղեկատվական շտաբից մեր գրավոր հարցմանն ի պատասխան տեղեկացրին, որ բուժհաստատություններում բարեկարգման աշխատանքներ են կատարվում։
«Այս փուլում նմուշառումները հետազոտության նպատակով ուղարկվում են Երևան՝ չի բացառվում, որ ինչ-որ փուլում այն հնարավոր լինի կազմակերպել տեղում՝ Արցախում: Լաբարատորիան տեխնիկապես անհրաժեշտ վիճակի բերելու հետ կապված աշխատանքները ավարտելուց հետո անհրաժեշտ որոշում կկայացվի»,-նշված էր պատասխանում:
Տեղեկատվական շտաբից վստահեցնում են նաև, որ Արցախի բոլոր շրջանների բուժհաստատություններում կան առանձնացված սենյակներ, անհրաժեշտության դեպքում քաղաքացիներին մեկուսացնելու համար։
«Շրջանների բժշկական կենտրոններում կահավորման և լրակահավորման աշխատանքներ են իրականացվել, որոշակի դեպքերում՝ նաև շինարարական թարմացումներ»,-հայտնում են տեղեկատվական շտաբից:
Տեղակատվական շտաբի տվյալների համաձայն, բուժհաստատություններում կա 2 մեկուսացված քաղաքացի, որոնց փորձանմուշների պատասխանները կստացվեն վաղը՝ ապրիլի 7-ին:
Մեկնաբանել