Վերջին մեկ շաբաթում ամերիկյան դոլարի փոխարժեքը հայկական դրամի նկատմամբ դանդաղ տեմպերով նվազում է։ 

Ըստ rate.am հարթակում ներկայացված փոխարժեքների` հայաստանյան բանկերում այսօր՝ ժամը 12:00-ի դրությամբ, 1 ԱՄՆ դոլարը գնվում է 488-492 դրամով (միջինը՝ 490.18 դրամ), վաճառվում է 496-500 դրամով (միջինը՝ 498.15 դրամ):  Համեմատության համար նշենք, որ վերջին օրերին դոլարի վաճառքը հատել էր նաև 510-ի շեմը։

Իսկ փոխանակման կետերում դոլարը գնվում է 490-492.5 դրամով, վաճառվում՝ 493-496 դրամով։

Ըստ Կենտրոնական բանկի տվյալների՝ ապրիլի 7-ին դոլարի միջին փոխարժեքը կազմել է 499.37 դրամ՝ նախորդ օրվա համեմատ նվազելով 2.18 դրամով։ Ապրիլի 1-ին այն կազմել է 504.96 դրամ։ 

Հիշեցնենք, որ դոլարը սկսել է թանկանալ մարտի սկզբից։ Մասնագետները դա բացատրում են բնակչության սպասումներով և սպեկուլյատիվ գործողություններով։ Որոշ շրջանակներ, որոնք զբաղվում են տարադրամի առուվաճառքով, հայտարարություններ են շրջանառում, որ դոլարի գինն ավելի է բարձրանալու: Դա ստիպել է մարդկանց ավելի շատ դոլար գնել։ Դրանով դոլարի նկատմամբ պահանջարկը բարձրացել է, հետևաբար բարձրացել է նաև դոլարի գինը։ 

Իսկ վերջին օրերի նվազումը կարող է նշանակել, որ դոլարի նկատմամբ պահանջարկը աստիճանաբար նվազում է։ 

• Ինչու է դոլարը թանկանում

• Ինչ վարքագիծ են դրսևորում դրամն ու հարևան երկրների արժույթներն այս օրերին

Իսկ 1 ռուսական ռուբլին այսօր՝ ժամը 12։00-ի դրությամբ, բանկերում գնվում է 6.30-6.46 դրամով (միջինը՝ 6.41 դրամ), վաճառվում՝ 6.68-6.90 դրամով (միջինը՝ 6.78 դրամ)։ 

Եվրոն գնվում է 593-603 դրամով (միջինը՝ 598.88 դրամով), վաճառվում է 611-624 դրամով (միջինը՝ 618.31 դրամ)։