Ոստիկանությունը հրաժարվում է հրապարակել այն մասնագետների անունները, ովքեր արտակարգ դրություն հայտարարելուց հետո ուսումնասիրել են լրատվամիջոցների, ինչպես նաև սոցիալական ցանցերի օգտատերերի հրապարակումների բովանդակությունը:

«Հրապարակված նյութի բովանդակությունը ուսումնասիրվում է ՀՀ ոստիկանության քրեական ոստիկանության վարչությունում իրավաբանական կրթություն ունեցող մասնագետներից բաղկացած աշխատանքային խմբի կողմից, և հաշվի առնելով, որ մասնագետները օպերատիվ ծառայողներ են, ուստի նրանց անձնական տվյալները ենթակա չեն տրամադրման»,- պատասխանել են ոստիկանության հասարակայնության հետ կապի և լրատվության վարչությունից։

Կառավարության մամուլի սրահում մարտի 23-ին ոստիկանության պետի տեղակալ Հայկ Մհրյանի ասուլիսի ժամանակ, պատասխանելով մեր հարցին, թե ինչի հիման վրա է ոստիկանությունը նյութերը հեռացնելու կամ խմբագրելու պահանջ ներկայացնում լրատվամիջոցներին, սոցիալական ցանցերի օգտատերերին և ինչպես է գնահատվում «խուճապ առաջացնող» է տեղեկատվությունը, թե ոչ, պատասխանել էր. «Մենք ունենք համապատասխան մասնագետներ, ովքեր այդ տեղեկատվությունը մանրակրկիտ ուսումնասիրում են և խուճապ առաջացնող տեղեկատվություն պարունակելու դեպքում անմիջապես արձագանքում են՝ հենվելով պարետի ցուցումի վրա»:

Ոստիկանությունից միաժամանակ «Հետք»-ին տեղեկացնում են, որ Հայաստանում արտակարգ դրություն հայտարարելուց հետո, մարտի 20-ի դրությամբ, 11 լրատվամիջոցի՝ Hraparak.am, Mamul.am, Iravunq.am, 168.am, Hayeli.am, News.am, Yerkir.am, Tert.am, Lurer.com, Infocom.am, Pastinfo.am ներկայացվել է նյութերի հեռացման 17 պահանջ, որոնցից հեռացվել է 7-ը։ Սոցիալական կայքերից գրառումներ հեռացնելու պահանջ է ներկայացվել 22 քաղաքացիների, ինչի արդյունքում բոլոր հրապարակումները հեռացվել են։

Մինչդեռ նույն մամուլի ասուլիսի ժամանակ ոստիկանության պետի տեղակալ Հայկ Մհրյանը, դարձյալ պատասխանելով «Հետք»-ի հարցին, ասաց, որ «եթե չի սխալվում՝ 22 լրատվամիջոցի հետ ոստիկանության ստորաբաժանումներն աշխատել են, հորդորել են, որ Կառավարության, մասնավորապես՝ պարետի ցուցումներին և պաշտոնական տեղեկատվությանը չհամապատասխանող տեղեկությունները հեռացվեն»: