«Լուսավոր Հայաստան» խմբակցության ղեկավար Էդմոն Մարուքյանն ԱԺ արտահերթ նիստում անդրադարձավ Վանաձորի «Գլորիա» կարի ֆաբրիկայում տեղի ունեցած միջադեպին, երբ ընկերության բազմաթիվ աշխատակիցներ գնացել էին արտադրամասի տարածք, և ոստիկանությունը տուգանել էր նրանց արտակարդ դրության ռեժիմը խախտելու համար:

«Ապրիլի 11-ին վարչապետն ուղիղ եթերում ասաց, որ ապրիլի քսանից տեքստիլ ոլորտը կվերագործարկվի, և մարդիկ կսկսեն աշխատել, որից հետո ԱԺ-Կառավարություն հարցուպատասխանին վարչապետն իմ հարցին ի պատասխան` վերահաստատեց իր հայտարարությունը: Վանաձորի «Գլորիա» կարի ֆաբրիկայի աշխատողները երեկ գնում են աշխատանքի, և Ոստիկանությունը սկսում է մարդկանց տուգանել: Ունենք իրավիճակ, որ պետությունը հայտարարում է ամսի քսանից կարող եք աշխատել, մարդիկ գնում են աշխատանքի, ու էդ մարդկանց տուգանում են»,-ասաց Մարուքյանը:

Պատգամավորը շեշտեց` նրանք այն մարդիկ են, որոնք կառավարության որևէ սոցիալական ծրագրի շահառու չեն:

«Ժողովրդի ասած կարկուտը ծեծած տեղն է ծեծում, հիմա էդ վիճակն է, ժողովուրդ ջան, էս ինչ քաոս է, կամ որոշեք ասեք` չեն աշխատում, կամ ասեք` աշխատում են, իմանանք աշխատում են, կամ եթե հայտարարում եք, որ աշխատում են, ինչու են գնում տուգանում»,-ասաց Մարուքյանը:

Մարուքյանի խոսքով`գործարանում 2600 քաղաքացի է աշխատում, հետևաբար այդքան ընտանիք «հացի խնդիր» է լուծում:

«Կոչ եմ անում երեկվա կազմած բոլոր վարչական ակտերը չեղարկել և մարդկանց չտուգանել»,-եզրափակեց նա:

Լուսանկարը` Ազատություն Ռ/Ը-ի: