HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Ֆինանսների նախարար. «2020-ին ՀՆԱ-ն կնվազի շուրջ 2 տոկոսով»

Խորհրդարանը Կառավարության նախաձեռնությամբ արտահերթ նիստ է հրավիրել: Ֆինանսների նախարար Ատոմ Ջանջուղազյանը ներկայացրեց «2020 թվականի պետական բյուջեի մասին» օրենքում փոփոխություն կատարելու Կառավարության առաջարկը:

Նախարարի խոսքով` ինչպես աշխարհի գրեթե բոլոր երկրներում, այնպես էլ Հայաստանում համավարակի ֆինանսական և տնտեսական հետևանքները մեղմելու նպատակով բյուջեի նախագծում փոփոխություն է առաջարկվում, որպեսզի հնարավորություն լինի հարկաբյուջետային քաղաքականությունը որպես գործիք ծառայեցնել տնտեսական հետևանքների մեղմանը, հետագայում նաև տնտեսության վերականգնմանը:

«Նախնական հաշվարկներով մոտ երկու տոկոս անկում կունենանք: 2020 թվականի բյուջեով 4,9 տոկոս աճի կանխատեսում կար, իսկ առաջարկվող նախագծով երկու տոկոս անկում կունենանք»,- ասաց նախարարը:

Ֆինանսների նախարարի ներկայացմամբ` տնտեսական անկման պայմաններում 2020-ին հարկային եկամուտները պետական բյուջեի սցենարի համեմատ կնվազեն մոտ 169.1 մլրդ դրամով:

«Մոտ 150 միլիարդ դրամանոց փաթեթ է առաջարկվում հավանության արժանացնել, որտեղ 25-ական միլիարդ դրամ ենթադրվում է պայմանական օգտագործել տնտեսական և սոցիալական խնդիրների մեղման նպատակով, մոտ 80 միլիարդ դրամ տնտեսական երկարաժամակետ զարգացմանն ուղղված ծրագրերի ֆինանսավորման համար և քսան միլիարդ դրամ` պահուստային միջոցներն ըստ անհրաժեշտության վերաբաշխելու համար»,- ասաց Ատոմ Ջանջուղազյանը:

Նախարարի խոսքով` ըստ այս սցենարի` արտաքին պարտք ներգրավելու կարիքը գնահատվում է մոտ 260 միլիարդ դրամ: Եւ ըստ դրա` պետական բյուջեի պակասուրդը կաճի` հասնելով համախառն ներքին արդյունքի (ՀՆԱ-ի) 5.0 %-ի:

Ըստ Ջանջուղազյանի` արտաքին շոկերն իրենց ազդեցությունն են ունեցել հայաստանյան տնտեսության վրա:

«Եթե արտաքին ցնցումներին անդրադառնանք, ապա ակնհայտ է, որ գործընկեր երկրներում տնտեսական աճը դանդաղում է, և կանխատեսվում է համաշխարհային տնտեսության անկում, այն գնահատվում է շուրջ երեք տոկոս: Սա չի կարող անհաղորդ մնալ Հայաստանի տնտեսության վրա: Մետաղների համաշխարհային գների անկումը ևս իր ազդեցությունն ունի որպես արտաքին ցնցում, նավթի համաշխարհային գների անկումը, հաշվի առնելով սերտ և ռազմավարական նշանակության համագործակցությունը Ռուսաստանի հետ, նաև ռուսական ռուբլու արժեզրկումը, այն ևս չի կարող ազդեդություն չունենալ»,- ասաց Ֆինանսների նախարարը:

Նախարարի խոսքով` ցնցումների շարքում պետք է դիտարկել նաև զբոսաշրջության անկումը, ինչպես նաև տրանսֆերտների կրճատումը:

Նախարարը որպես տնտեսական բացասական ազդեցություն որակեց նաև ներքին սահմանափակումները, տնտեսական որոշ գործունեության տեսակների սահմանափակումները, մեկուսացման և կարանտինի համար հատկացվող միջոցները:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter