HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Բաբկեն Թունյան. «Հայաստանում 300 միլիարդ ազատ փող չկա»

Ազգային ժողովի տնտեսական հարցերի մշտական հանձնաժողովի նախագահ Բաբկեն Թունյանը վստահեցնում է, որ Հայաստանում որևէ քաղաքացի հացի խնդիր չի ունենալու, և Կառավարության աջակցության ծրագրերն ավելանալու են:

Այս մասին խորհրդարանում 2020 թվականի պետական բյուջեի մասին օրենքում փոփոխություն կատարելու Կառավարության օրենսդրական առաջարկի քննարկմանն իր ելույթում ասաց պատգամավորը: Անդրադառնալով ներկայացված նախագծին՝ Թունյանը փորձեց քաղաքացիների համար հնարավորինս մատչելի բացատրել այս նախագծի նպատակահարմարությունը:

«Ունենք ճգնաժամային իրավիճակ, և այդ իրավիճակում բնականաբար բիզնեսները չեն աշխատում, եկամուտները քչանում են, և քիչ հարկեր են հավաքագրվում, բայց մյուս կողմից պետությունն ունի ծախսեր, որոնք պետք է կատարվեն` աշխատավարձեր, թոշակներ պետք է բաժանվեն, կապիտալ շինարարություն պետք է արվի, ռազմական ծախսեր պետք է արվեն: Մենք ծախսերը պահում ենք նույն մակարդակի վրա, չենք կրճատում, բայց ավելի քիչ հարկ ենք հավաքելու, ու առաջանում է ճեղքվածք, դեֆիցիտ, որը նախատեսված էր, որ պետք է լինի 160 միլիարդ դրամ, հիմա մեծացնում ենք դեֆիցիտը: Դասական տնտեսագիտական քայլ ենք անում ճգնաժամային իրավիճակում` ավելի շատ փող ծախսում ենք, քան հավաքում, սրա մասին է այսօրվա նախագիծը»,- ասաց Թունյանը:

Անդրադառնալով ընդդիմադիրների քննադատությանը` Թունյանն ասաց, որ գործընկերները վկայակոչում են ծրագրային բյուջետավորման պահանջը, ըստ որի յուրաքանչյուր ծախս պետք է լինի կոնկրետ ծրագրի տակ ու ունենա իր նպատակը:

«Եթե սովորական պայմաններում լինեինք, իհարկե ճիշտ էր սա, բայց մենք ճգնաժամային իրավիճակում ենք, որտեղ ֆորսմաժորային պայմաններից ելնելով շատ անգամ որոշումների կայացումը արագ պետք է կատարվի ու հնարավոր չէ ամեն ինչ ի սկզբանե կանխատեսել»,- ասաց քաղաքական մեծամասնության պատգամավորը:

Բաբկեն Թունյանը խոսեց Էդմոն Մարուքյանի այն պնդման մասին, որ կա ազատ 300 միլիարդ դրամ, որը կարելի է ուղղել մարդկանց աջակցելուն:

«Հայաստանում 300 միլիարդ ազատ փող չկա, եթե խոսքը միասնական գանձապետական հաշվի մասին է, էնտեղ մնացորդը մի քանի անգամ պակաս է և հստակ ծրագրային նպատակ ունի, ազատ փող չի, որ ինչպես ուզենանք ծախսենք: Այսինքն ինչ, որևէ մեկին թվում է, որ էնտեղ սունդուկով փողերը դրված են կամ որևէ հաշվի վրա ու մեզ կրակն ենք գցել լրացուցիչ փողի աղբյուր ենք ման գալիս»,- ասաց նա:

Թունյանի խոսքով` այն երկրներում, որտեղ քաղաքացիներին համատարած գումար են բաժանում, դրա արդյունավետությունը հետո է երևալու, քանի որ գումարն նոր են բաժանում, և բացի դա` այն միակ գործիքը չէ, որ կիրառվում է:

«Հարգելի քաղաքացիներ, ինչքան ձեզ պետք է, փողը բաժանվելու է, Հայաստանում ոչ մի մարդ հացի խնդիր չի ունենալու, եղած միջոցառումներն ավելանալու են, այդ թվում շատ ավելի համապարփակ միջոցառումներ, քան պատկերացնում եք»,- եզրափակեց նա:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter