Քննչական կոմիտեն ապրիլի վերջին շաբաթվա ընթացքում երկու հաղորդագրություն հրապարակեց համայնքային սեփականություն հանդիսացող հողերը ցածր վարձավճարով վարձակալության տրամադրելու, կարճ ժամանակ հետո շատ բարձր վարձավճարով ենթավարձակալությամբ հեռահաղորդակցության կապի օպերատորներին տրամադրելու  մասին: Առաջին քրեական գործերը հարուցվեցին Կոտայքի մարզի Գառնիի  և Կարենիսի նախկին համայնքապետերի դեմ: Քննչական կոմիտեն հաշվարկել է համայնքին պատճառված վնասը, որը նրանք պարտավորվել են վերականգնել:

Դատախազությունից տեղեկացանք, որ 6 մարզի 14 համայնքներում վարձակալության, ենթավարձակալության գործընթացներում թույլ տրված պաշտոնեական լիազորությունների չարաշահման հատկանիշներով 14 քրեական գործ է հարուցվել:

«Ակտիվորեն ընթանում է համայնքներին պատճառված վնասները վերականգնելու, ինչպես նաև վարձակալության պայմանագրերը լուծելու և նոր պայմանագրեր կնքելու գործընթացը»,- հայտնում են դատախազությունից:

«Հաշվի առնելով, որ նկարագրված սխեմայի կիրառումը կարող է ընդգրկել հանրապետության ողջ տարածքը՝ ներառելով բազմաթիվ համայնքներ՝ Հանրապետության գլխավոր դատախազը մարզերի դատախազներին հանձնարարել է յուրաքանչյուր մարզի կտրվածքով նախաձեռնել մանրակրկիտ ուսումնասիրություն »,- ասվում է դատախազության հաղորդագրության մեջ:

«Հետք»-ը այս թեմայի վերաբերյալ հոդված է հրապարակել 2017 թվականին: Հոդվածում բազմաթիվ համայնքների անուններ ենք նշել, որոնց ղեկավարները ոչ միայն համայնքային սեփականություն հանդիսացող հողամասերը վարձակալել են, որից հետո ենթավարձակալության են հանձնել բջջային օպերատորներին, այլև սեփականացրել են հողատարածքը և իբրև սեփականություն են տրամադրում օպերատորներին: Ներկայացրել ենք Նոյեմբերյան քաղաքի օրինակը, որտեղ տեղադրված է 2 կայան, 2-ն էլ մասնավոր անձի հողատարածքում: Դրանցից մեկը Նոյեմբերյանի նախկին քաղաքապետ Վանուշ Ամիրաղյանի դստեր` Արփինե Ամիրաղյանի սեփական հողատարածքում է տեղադրվել:

Ցույց ենք տվել կադաստրի աշխատակիցների ներգրավվածությունը այս սխեմային Սյունիքի Լեռնաձոր համայնքի օրիակով:

Այս ամենին հավելենք, որ կայանները տեղադրելուց հետո էլ հողերի նշանակությունը չեն փոխել, դրանք մնացել են գյուղնշանակության հողատարածքներ: