Սահմանափակելով հավաքների ազատությունը՝ երաշխավորում ես մարդու կյանքի և առողջության իրավունքը: Ազգային ժողովի հատուկ նիստին այսպիսի հայտարարություն արեց խորհրդարանի պետական-իրավական հարցերի մշտական հանձնաժողովի նախագահ Վլադիմիր Վարդանյանը՝ անդրադառնալով արտակարգ դրության ռեժիմի ժամանակ կիրառվող սահմանափակումներին:

Ըստ պատգամավորի՝ սահմանափակումները արդարացի են ինչպես արակարգ դրության ռեժիմի պարագայում, այնպես էլ դրանից դուրս, եթե առկա են անհրաժեշտ և համաչափ հիմքեր ժողովրդավարական հասարակություններում և նպատակ են հետապնդում պահպանել սահմանադրական արժեքներ:

Խոսելով քաղաքացիների տեղորոշման համակարգի և դրա վերաբերյալ ընդունված օրենսդրական ակտի քննադատությունների մասին՝ Վլադիմիր Վարդանյանն ընդգծեց, որ օրենքի տված հնարավորությունները շատ ավելի մեծ են, քան իրականում դրա կիրառումը: 

«Եվրոպայի գրեթե բոլոր պետությունները այս կարգի տարատեսակ մեխանիզմներ են կիրառում»,- ասաց պետաիրավական հարցերի հանձնաժողովի նախագահը:

Վերադառնալով հավաքների ազատության թեմային՝ Վլադիմիր Վարդանյանը հորդորեց այդ հարցով անհանգստացողներին դիմել իրեն և բացատրություն ստանալ՝ տարբեր երկրներում արտակարգ դրության ռեժիմի չարաշահումների և միջազգային կառույցների արձանագրած խախտումների մասին: 

Վլադիմիր Վարդանյանը խոսեց նաև արտակարգ դրության օրերին ոստիկանության գործողությունների մասին՝ ընդգծելով, որ եթե ոստիկանության աշխատակիցները թույլ են տալիս ոստիկանության մասին օրենքի խախտումներ, ապա պետք է ենթարկվեն պատասխանատվության, սակայն արտակարգ դրության ժամանակ իրավական պետությունը և իրավունքի գերակայությունը շարունակում են գործել՝ ներառյալ անմեղության կանխավարկածն ու պատշաճ դատաքննության իրավունքը: Ըստ պատգամավորի՝ արտակարգ դրության օրերին Հայաստանի դատական իշխանությունները գործել են հավուր պատշաճի:

Հիշեցնենք, որ այսօր Հայաստանի Հանրապետությունում արտակարգ դրության ռեժիմը երկարացվեց մինչև հուլիսի 13-ը: