«Բարգավաճ Հայաստան» կուսակցության հիմնադիր Գագիկ Ծառուկյանի փաստաբան Էմին Խաչատրյանը «Հետք»-ի հետ զրույցում որոշ մանրամասներ է հայտնել մեղադրանքի վերաբերյալ Ծառուկյանի դիրքորոշման, պաշտպանների գործողությունների մասին։

-Պարո’ն Խաչատրյան, Գագիկ Ծառուկյանին երեկ միայն մե՞կ հոդվածով է մեղադրանք առաջադրվել։

-Այո՛, մեղադրանք առաջադրվել է Քրեական օրենսգրքի 154.2  հոդվածով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):

-Նա մեղադրանքի վերաբերյալ դիրքորոշում հայտնե՞լ է, ցուցմունք տվե՞լ է։

-Իհարկե, մեղադրանքը չի ընդունել, դիրքորոշում է հայտնել, որ իրեն ապօրինի, չհիմնավորված մեղադրանք է առաջադրվել, որի տակ  քաղաքական ենթատեքստ կա: Այս պահին, կարծում եմ, նպատակահարմար չէ ցուցմունքից մանրամասներ հայտնել։

-Երեկ՝ մինչև Ծառուկյանին անձեռնմխելիությունից զրկելու Ազգային ժողովի թույլտվությունը, նա Ազգային անվտանգության ծառայությունում էր։ Ի՞նչ գործի շրջանակներում էր ցուցմունք տալիս։

-Ցուցմունք էր տալիս ԱԱԾ-ի տարածած հայտարարությունների շրջանակներում, հետո մեղադրանք են առաջադրել, նաև մեղադրանքի շուրջ ենք ցուցմունք տվել ու դուրս եկել։ Իհարկե, ընթացքում ընդմիջումներ են տվել, որպեսզի անընդմեջ չմասնակցենք քննչական գործողությունների։

-Մինչև մեղադրանք առաջադրելը Գագիկ Ծառուկյանը վկայի դատավարական կարգավիճակով ցուցմունք տվե՞լ է այն գործի շրջանակներում, որով հետո նրան մեղադրանք է առաջադրվել։

-Ո՛չ, չի տվել։

-Բացի մեղադրանք առաջադրելուց Ծառուկյանի մասնակցությամբ որևէ այլ քննչական գործողություն իրականացվե՞լ է։

-Ծանոթացրել են նաև դատարան ներկայացվող միջնորդությանը, այս պահին պլանավորած այլ քննչական գործողություն չունենք։

-ԱԱԾ քննիչին ներկայացրե՞լ եք Գագիկ Ծառուկյանին գրավի դիմաց ազատ արձակելու միջնորդություն։

-Չենք ներկայացրել, որովհետև մենք գտնում ենք, որ կալանքի հիմքեր առհասարակ գոյություն չունեն, անգամ հիմնավոր կասկածի շեմը հաղթահարված չէ։

-Ծառուկյանի վերաբերյալ ԱԱԾ-ի հայտարարություններից հետո իրավաբանների մի խումբ տեսակետ հնչեցրեց, որ առանց Ծառուկյանի անձեռնմխելիությունը հաղթահարելու՝ նրա նկատմամբ քրեական հետապնդում է սկսվել։ Դուք համամի՞տ եք։

-Մեր փաստաբանական խմբի անդամներից Սմբատ Մինասյանը այս առնչութjամբ երեկ հանցագործության մասին հաղորդում է ներկայացրել գլխավոր դատախազին՝ ԱԱԾ առանձին աշխատակիցների գործողություններին քրեաիրավական գնահատական տալու վերաբերյալ՝ կապված հենց այն հանգամանքի հետ, որ անձի անձեռնմխելիությունը դեռ չհաղթահարված ժամանակահատվածում բացահայտ քրեական հետապնդում է իրականացվել մեր պաշտպանյալի նկատմամբ։

-Գագիկ Ծառուկյանը մասնակցելու՞ է իրեն կալանավորելու միջնորդության քննությանը։

-Միանշանակ, պարոն Ծառուկյանը ներկա է լինելու դատական նիստին։ Մենք վարույթն իրականացնող մարմնին նման հաճույք չենք պատճառի։