Դատավոր Դավիթ Գրիգորյանին և նրա նիստերի քարտուղար Գոռ Վարդանյանին արդարացնելու որոշման դեմ վերաքննիչ բողոքը ներկայացրել է գլխավոր դատախազ Արթուր Դավթյանը։ Այս մասին տեղեկանում ենք «Դատալեքս» դատական-տեղեկատվական համակարգից։ Գործը հուլիսի 2-ին մակագրվել է, նախագահող դատավորը Սևակ Համբարձումյանն է, կազմում են դատավորներ Նարինե Հովակիմյանն ու Արսեն Նիկողոսյանը։

Վերջինս այն դատավորն է, ով 2019 թվականի օգոստոսին քննել է Դավիթ Գրիգորյանի աշխատասենյակում խուզարկություն իրականացնելու թույլտվության դեմ նրա պաշտպան Գեորգի Մելիքյանի բողոքն ու բավարարել այն։

Պաշտոնեական կեղծիք կատարելու մեջ մեղադրվող  դատավոր Դավիթ Գրիգորյանի և դրան օժանդակելու մեջ մեղադրվող դատավորի նիստերի քարտուղար Գոռ Վարդանյանի նկատմամբ քրեական հետապնդումը դադարեցվել է հանցակազմի բացակայության հիմքով՝ գործը դատական քննության նախապատրաստելու փուլում։ Որոշումը կայացրել է Երևանի ընդհանուր իրավասության դատարանի դատավոր Դավիթ Բալայանը։

Հիմնավորումներում դատավորը պարբերաբար անդրադարձել է Արթուր Դավթյանի իրավական գնահատականներին ու մեկնաբանություններին, գրել, որ գլխավոր դատախազն իմաստազրկել է դատավորի անձեռնմխելիության ինստիտուտը, վարույթն իրականացնող մարմնին զրկել բազմակողմանի, լրիվ և  օբեկտիվ նախաքննություն իրականացնելու օրենսդրական հնարավորությունից։

Վերաքննիչ դատարանում դեռևս առկա չէ տեղեկատվություն՝ դատարանի կազմի կողմից գործը վարույթ ընդունելու վերաբերյալ։