Երեկ Ամուլսարի դիրքերում բազմամարդ բողոքի ակցիա էր անցկացվում այն բանից հետո, երբ օգոստոսի 4-ի գիշերը «Լիդիան Արմենիա» ընկերության նոր պահնորդական ծառայությունը վերամբարձ կռունկներով տեղափոխել էր Ամուլսարի 1-ին և 2-րդ դիրքերում տեղադրված տնակները եւ փոխարենը դրել ընկերությանը պատկանող նոր տնակներ։

Ամուլսարի ոսկու հանքը շահագործելու դեմ պայքարող տեղացիները և Հայաստանի այլ վայրերից միացած քաղաքացիները օրվա երկրորդ կեսին տնակների մոտ էին՝ պահանջելով հանել նոր տեղադրված տնակները։ Մինչև ուշ գիշեր տեղի ունեցած ինքնաբուխ բողոքի գործողությունների ընթացքում լարված իրավիճակ էր․ ոստիկանությունը սկզբում բերման էր ենթարկում բողոքի դուրս եկած քաղաքացիներին, այնուհետև՝ նաև «Լիդիան Արմենիա» ընկերության պահնորդական ծառայության մի քանի աշխատակցի։