HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արմեն Միրզոյան

Միանգամից մի քանի հեռուստալրագրողներ հայտարարել են Բելառուսի պետական հեռուստաընկերություններից հեռանալու մասին

Միանգամից մի քանի հեռուստալրագրողներ հայտարարել են, որ հեռանում են բելառուսական պետական հեռուստաընկերություններից։ Այդ մասին գրում է «Meduza»-ն։

«OHT» (համազգային հեռուստատեսություն) հեռուստատեսությունից հեռանալու մասին հայտարարել են հաղորդավարներ Եվգենի Պերլինը և Օլգա Բոգատիրևիչը։ «Այս որոշման վրա որևէ մեկն ազդեցություն չի ունեցել, ես ինքս եմ այն կայացրել։ Հուսամ, որ շուտով կվերադառնա այն՝ #МаяКраiнаБеларусь-ը»,- ինստագրամյան իր էջում գրել է Պերլինը։ Իր հերթին Օլգա Բոգատիրևիչն էլ հայտարարել է, որ իրենք քիչ են, սակայն կան։

Աշխատանքից ազատման դիմում է գրել նաև «Беларусь 1» հեռուստաընկերությամբ հեռարձակվող «Բարի լույս, Բելառուս» հաղորդման հաղորդավարուհի Վերա Կարետնիկովան։ «Ես գրել եմ, որ շուտով ամեն բան լավ կլինի։ Այդպես էլ կլինի»,- ինստագրամյան իր էջում գրել է նա։ Նախօրեին, նույն հեռուստաընկերությունից հեռացել էր նաև հաղորդավար Սերգեյ Կոզլովիչը։

Ինչպես հավելում է «Tut.by»-ը, աշխատանքից ազատման դիմումներ են գրել նաև «СТВ» հեռուստաընկերության հաղորդավար Տատյանա Բորոդկինան, «Беларусь 1»-ի հաղորդավար Անդրեյ Մակայենոկը և Բելառուսի ռադիոյի առաջին ալիքի աշխատակիցներ Ալեքսանդր Շուստերը և Տատյանա Ֆիլիպչենկոն։ Իր աշխատանքից ազատման վերաբերյալ տեսաուղերձ է հրապարակել նաև «Беларусь 1» հեռուստաընկերության «Արսենալ» ռազմական հաղորդաշարի հաղորդավար Վլադիմիր Բուրկոն։ «Հինգ տարի ես անուղղակիորեն եղել եմ Բելառուսի Հանրապետության պաշտպանության նախարարության մեդիադեմքը․․․Ես նույնիսկ ամենավատ երազում չէի պատկերացնի, որ զինծառայողները և տեխնիկան, որոնց մասին ես պատմում էի, կարող են կիրառվել սեփական ժողովրդի դեմ»։

Բելառուսում օգոստոսի 9-ից ընթանում են բողոքի ցույցեր, որոնց մասնակիցները չեն ընդունում նախագահական ընտրությունների արդյունքները։ Երկրի ԿԸՀ տվյալներով՝ նախագահական ընտրություններում հաղթել է գործող նախագահ Ալեքսանդր Լուկաշենկոն, որը երկիրը ղեկավարում է շուրջ 26 տարի։ Ոստիկանությունը և զինուժը բիրտ ուժ են կիրառում ցուցարարների նկատմամբ՝ օգտագործելով լուսաձայնային նռնակներ և ռետինե փամփուշտներ։ Բողոքի ցույցերի ընթացքում բերման է ենթարկվել շուրջ 6 000 ցուցարար։ Հարուցվել են տասնյակ քրեական գործեր։

Լուսանկարը՝ Բելառուսի պետական ռադիոհեռուստաընկերության

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter