Տեսանյութեր
Լուսանկարներ
Ինտերնետի պահանջարկն աճել է, բջջային կապինը՝ նվազել. կապի շուկան՝ համավարակի օրերին
2020 թվականի առաջին կիսամյակում ինտերնետի մատակարարման շուկայի ընդհանուր հասույթը աճել է 12.1%-ով, բջջային կապինը՝ նվազել 20.9%-ով։
Այս տարի ինտերնետի պահանջարկը Հայաստանում շարունակել է աճել՝ ի տարբերություն բջջային կապի, որից հեռահաղորդակցության օպերատորներն ավելի քիչ հասույթ են ստանում։
Չնայած այս միտումը կապի հայկական շուկայում նոր չէ, սակայն ակնհայտ էր, որ այս տարվա մարտի սկզբից բռնկված համավարակի արդյունքում մի շարք աշխատողներ, դպրոցականներ և այլք անցան օնլայն ռեժիմի, որն էականորեն մեծացրեց ինտերնետի պահանջարկը։
Փոխարենը կրճատվում է բջջային շուկան։ Եթե տարիներ առաջ օպերատորների՝ բջջային շուկայից ստացվող հասույթը մի քանի անգամ գերազանցում էր ինտերնետի մատակարարումից ստացվող հասույթը, ապա այժմ ինտերնետն առաջ է անցել։
Այս տարվա առաջին կիսամյակում Հայաստանում կապի շուկայի ընդհանուր հասույթը կազմել է մոտ 69 մլրդ դրամ։ Այս գումարը գոյանում է ինչպես հեռահաղորդակցության ոլորտից՝ բջջային կապի և ինտերնետի մատակարարումից, այնպես էլ՝ որոշ չափով հեռուստառադիոծրագրերի հեռարձակումից։
Ըստ Վիճակագրական կոմիտեի (ՀՀ ՎԿ) տվյալների՝ 2019 թվականի առաջին կիսամյակի համեմատ կապի շուկայի հասույթը նվազել է 4%-ով։ Սա տեղի է ունեցել հիմնականում բջջային կապի շուկայի կրճատման հետևանքով։
Կապի շուկայի առաջատարը հեռահաղորդակցության ոլորտն է, որի հիմնական հատվածը բջջային ու ինտերնետ հասանելիության ծառայություններն են (տե՛ս գրաֆիկում)։
Այս տարվա առաջին կիսամյակում բջջային շուկայի հասույթը կազմել է 20.5 մլրդ դրամ, որը նախորդ տարվա նույն կիսամյակի համեմատ 20.9%-ով նվազել է։
Փոխարենը 12.1%-ով աճել է ինտերնետի մատակարարումից ստացվող հասույթը՝ կազմելով 28 մլրդ դրամ։
Կրճատվել է նաև հեռուստառադիոծրագրերի կազմման և հեռարձակման գործունեությունից ստացվող հասույթը։
Նաև հարկ է նշել, որ ոչ մեծ տեմպերով՝ 3.2%-ով աճել է մալուխային հեռուստատեսության մատակարարումից ստացվող հասույթը։
Կապի շուկայի ընդհանուր հասույթը սկսել է կրճատվել մարտից, որի արդյունքում առաջին եռամսյակում ոլորտում անկումը կազմել է 1.2%: Երկրորդ եռամսյակում այս անկումը խորացել է՝ կազմելով 6.8%: Այսինքն՝ չնայած ինտերնետի պահանջարկի աճին, կապի ընդհանուր շուկայի վրա համավարակի ազդեցությունը երկրորդ եռամսյակում զգացվել է։
Հայաստանի խոշոր հեռահաղորդակցության օպերատորները վստահեցնում են, որ ունեն պահուստային միջոցներ՝ արտակարգ դրության ժամանակ անխափան գործելու համար: Ավելի վաղ «Հետքի» հետ զրույցում «Յուքոմ»-ից տեղեկացրել են, որ ընկերության առաջարկած ինտերնետ ծառայություններից օգտվողների թիվն աճել է կարանտինի օրերին, օրինակ՝ մոբայլ օգտագործողների 5-10% աճ կա նախորդ տարվա նույն ժամանակաշրջանի համեմատությամբ:
«Բիլայնը» ևս այդ օրերին սպառման ծավալների դրական դինամիկա է արձանագրել։
Կապի շուկայի տեսակարար կշիռը Հայաստանի ՀՆԱ-ում վերջին տարիներին 3-3.5% է կազմել։ Հատկանշական է, որ այս տարվա թե՛ առաջին, թե՛ երկրորդ եռամսյակում այս կշիռն ավելացել է՝ երկրորդ եռամսյակում հասնելով 4.6%-ի։ Դա տեղի է ունեցել տնտեսության մի շարք ոլորտների կրճատման և զուգահեռաբար կապի ծավալների աճի արդյունքում։
Ցավոք, հեռահաղորդակցության խոշոր օպերատորները դեռևս չեն հրապարակել երկրորդ եռամսյակի ֆինանսական հաշվետվությունները, որը ևս թույլ կտար հասկանալ, թե համավարակն ու հայտարարված արտակարգ դրությունն ինչպես են ազդել շուկայի վրա։
Մեկնաբանել