Ազգային ժողովի նախկին պատգամավոր Ալեքսան Պետրոսյանի վերաբերյալ քրեական գործը մակագրվել է Երևանի ընդհանուր իրավասության դատարանի դատավոր Վարդան Լևոնի Գրիգորյանին։ Այս մասին տեղեկանում ենք «Դատալեքս» դատական-տեղեկատվական համակարգից։

Բնապահպանության նախկին նախարար Արամ Հարությունյանին փողերի լվացման հարցում օժանդակելու մեջ մեղադրվող Պետրոսյանի գործը գտնվում էր մեկ այլ դատավորի՝ Վարդան Արմենակի Գրիգորյանի վարույթում, սակայն վերջինիս լիազորությունները օգոստոսի 23-ին դադարել են, ուստի գործը վերամակագրվել է։

Դատալեքսում դեռևս տվյալներ չկան՝ դատավոր Վարդան Լևոնի Գրիգորյանի կողմից գործը վարույթ ընդունելու վերաբերյալ, մակագրումը տեղի է ունեցել երեկ։

Ըստ գործի նյութերի՝  «ՄԱՊ» ՓԲ ընկերության սեփականատեր Ալեքսան Պետրոսյանը մտերիմ հարաբերություններ է ունեցել Արամ Հարությունյանի հետ:

2007թ. հունիսի 8-ին Արամ Հարությունյանը նշանակվել է Բնապահպանության նախարար, և կառավարության որոշման համաձայն՝ ի պաշտոնե հանդիսացել նաև ռազմավարական նշանակություն ունեցող օգտակար հանածոներ պարունակող ընդերքի տեղամասերի նկատմամբ հանքային իրավունքի ձևավորման միջգերատեսչական մրցութային հանձնաժողովի նախագահ։

2007թ. աշնանը Արամ Հարությունյանը «Հանրապետական երկրաբանական ֆոնդ» ՊՈԱԿ-ի տնօրենի տեղակալ, իր մտերիմ Սուրեն Միքայելի Ավագյանից տեղեկացել է, որ գործարար Սիլվա Համբարձումյանն ունի ՀՀ-ում հանքարդյունաբերությամբ զբաղվելու մտադրություն և հետաքրքրություն է դրսևորել օգտակար հանածոների արդյունահանման նպատակով երկրաբանական ուսումնասիրության լիցենզիաներ ձեռք բերելու հարցում:

Ըստ գործի՝ Արամ Հարությունյանը, Սիլվա Համբարձումյանից հավաստիանալով, որ նա պատրաստակամ է առանձնապես խոշոր չափերի կաշառք տալ 10 ուսումնասիրության հատուկ լիցենզիաներ ձեռք բերելու համար, տվել է իր համաձայնությունը նրա օգտին իր լիազորությունների շրջանակներում  գործողություններ կատարելու հարցում և առաջարկել ուսումնասիրել երկրաբանական ֆոնդի տվյալներն ու ներկայացնել առաջարկություն հետաքրքրող կոնկրետ հանքերևակումների վերաբերյալ, և պահանջված կաշառքի գումարի մի մասն  օրիանականցնելու համար Հարությունյանը դիմել է Ալեքսան Պետրոսյանին։

Վերջինս, ըստ մեղադրանքի, հանցավոր ճանապարհով ստացված գույքն օրինականացնելուն օժանդակելու դիտավորությամբ, առաջարկն ընդունել է և պատրաստակամություն հայտնել կազմակերպել իրեն պատկանող, Բրիտանական Վիրջինյան Կղզիներում գրանցված՝ «Տառասկո Ինվեսթմենթ» ՍՊ ընկերության և Հայաստանում գործունեություն իրականացնող «ՄԱՊ» ՓԲ ընկերության միջոցով գումարները Հայաստանի Հանրապետություն փոխանցելու, դրանք կանխիկացնելու և պաշտոնատար անձին տրամադրելու գործընթացը:

Այնուհետև, ձեռք բերված պայմանավորվածության համաձայն, Ալեքսան Պետրոսյանը Արամ Հարությունյանին է տրամադրել «Տառասկո Ինվեսթմենթ» ՍՊ ընկերության՝ Շվեյցարիայի Համադաշնության Ցյուրիխ քաղաքում գտնվող բանկերից մեկում իր հաշվեհամարը, որից հետո Արամ Հարությունյանը կազմակերպել է Սիլվա Համբարձումյանից ստացած առանձնապես խոշոր չափերով կաշառքի գումարի՝ 5.049.005 դոլարի փոխանցումն այդ հաշվեհամարին:

Ըստ մեղադրանքի՝ Արամ Հարությունյանի պահանջով նրա մտերիմ Վիկտոր Մարտիրոսյանը 2011թ. մարտի 24-ին Արաբական Միացյալ Էմիրությունների Աբու Դաբիի բանկերից մեկի իր հաշվեհամարից 2.001.005 դոլար, իսկ 2011թ. մարտի 29-ին Արամ Հարությունյանն անձամբ Աբու Դաբի քաղաքի նույն բանկի իր հաշվեհամարից 3.047.975 դոլար գումարները փոխանցել է «Տառասկո Ինվեսթմենթ»  ՍՊ ընկերության վերը նշված հաշվեհամարին: Այնուհետև Ալեքսան Պետրոսյանն իրեն պատկանող կազմակերպության հաշվեհամարին ստացված գումարներից 1.901.000 դոլարը՝ 2011թ. մարտի 28-ին, իսկ 3.048.000 դոլարը՝ մարտի 29-ին փոխանցել է Շվեյցարիայի Համադաշնությունում գտնվող բանկի իր անձնական հաշվեհամարին, ապա տարբեր ժամանակահատվածներում  դրանք կրկին մուտքագրել «Տառասկո Ինվեսթմենթ» ՍՊ ընկերության ինչպես վերոհիշյալ, այնպես էլ այլ բանկերում եղած տարբեր հաշվեհամարների:

Դրանից հետո «Տառասկո Ինվսեթմենթ» ՍՊԸ-ի և «ՄԱՊ» ՓԲ ընկերության միջև 2009թ. հունվարի 5-ին կնքված անտոկոս փոխառության պայմանագրի ուժով 2011թ. մարտի 29-ից մինչև 2014թ. օգոստոսի 25-ն ընկած ժամանակահատվածում Ալեքսան Պետրոսյանը նշված գումարից 2.792.730  դոլարը փոխանցել է «ՄԱՊ» ՓԲ ընկերության Հայաստանյան բանկերում եղած հաշվեհամարներին, իսկ մնացած մասը տնօրինել «Տառասկո Ինվեսթմենթ» ՍՊ ընկերության միջոցով, օգտագործել բիզնես գործունեության նպատակով:

Ըստ մեղադրանքի՝ «Տառասկո Ինվեսթմենթ»  ՍՊԸ-ի բանկային հաշվեհամարներից «ՄԱՊ»  ՓԲԸ-ի հաշվին գումարներ փոխանցելուն զուգահեռ Ալեքսան Պետրոսյանն ինչպես հիշյալ գումարներից, այնպես էլ իր անձական միջոցներից, 2011թ. ապրիլ ամսից մինչև 2016թ. դեկտեմբեր ամիսն ընկած ժամանակահատվածում Արամ Հարությունյանին մաս-մաս տվել է նրա կողմից «Տառասկո Ինվեսթմենթ» ՍՊԸ-ի հաշվեհամարին փոխանցված ընդհանուր  1.861.586.143 դրամին համարժեք 5.049.005 դոլար գումարը:

Ալեքսան Պետրոսյանն իրեն առաջադրված մեղադրանքը չի ընդունում։ Վերջինս պնդում է, որ միմյանց հաշվեհամարին գումարների շարժը, միանգամյա գործարքը դեռևս չի նշանակում, որ փողերի լվացում է իրականացվել, կամ  ինքն օժանդակել է փողերի լվացման հարցում: Պետրոսյանը նաև հայտնել է, որ տարբեր անձանց հետ ունեցել է գործարքային փոխհարաբերություններ, նրանց հանձնված և ստացված փոխառություններ, և  քրեական գործով քննության առարկա դարձած գումարները ևս Արամ Հարությունյանից ստացվել են փոխառության տեսքով, եթե փողերի լվացման ցանկություն լիներ, դա չէր արվի օրինական բանկային փոխանցումների միջոցով։

Լուսանկարում՝ դատավոր Վարդան Լևոնի Գրիգորյանը