Եվրոպական միության անդամ երկրները լիդերների մակարդակով Եվրոպայի խորհրդի դռնփակ նիստ են հրավիրել, որի ժամանակ քննարկվել են արտաքին քաղաքականությանը և անվտանգությանը վերաբերող հարցեր:

Այս մասին Հետքի հետ զրույցում ասաց «Իմ քայլը» խմբակցության պատգամավոր, ՆԱՏՕ-ի խորհրդարանական վեհաժողովի հայկական պատվիրակության անդամ Վիկտոր Ենգիբարյանը:

«Բայց տարածված լուրերի համաձայն՝ Կիպրոսը, Ավստրիան, Ֆրանսիան, Հունաստանը մեծ ճնշում են գործադրել ԵՄ մյուս գործընկերների վրա, որ Թուրքիայի նկատմամբ սանկցիաներ կիրառվեն միջազգային իրավունքը խախտելու համար»,- ասաց Ենգիբարյանը: Պատգամավորը չափազանց կարևորում է ՆԱՏՕ-ի դերակատարությունը` ընդգծելով՝ կարևոր է, որ հնարավորինս շատ ճնշումներ լինեն Թուրքիայի նկատմամբ:

Հիշեցնենք՝ Ֆրանսիայի նախագահ Էմանուել Մակրոնը հայտարարել է, որ Ֆրանսիան` որպես Լեռնային Ղարաբաղի հակամարտության կարգավորմամբ զբաղվող ԵԱՀԿ Մինսկի խմբի անդամ, մտադիր է բացատրություն պահանջել Թուրքիայից իր տարածքով սիրիացի զինյալների Ադրբեջան տեղափոխման առնչությամբ, նույնը պահանջելու է նաև ՆԱՏՕ-ից` կոչ անելով առերեսվել իր կազմակերպության անդամ Թուրքիայի վարքագծին:

Հարցին, թե որքանով է հնարավոր, որ այս իրավիճակում ՆԱՏՕ-ն կդադարեցնի Թուրքիայի անդամակցությունը, քաղաքական մեծամասնության պատգամավորը պատասխանում է՝ իրատեսական չի համարում, որ Թուրքիան ՆԱՏՕ-ի բյուջեին իր ՀՆԱ-ի հաշվով շատ ավելի մեծ գումար է հատկացնում, քան շատ այլ երկրներ: Պատգամավորը, սակայն, դիվանագիտական հաղթանակ է համարում տարբեր միջազգային կառույցների դատապարտող հայտարարությունները:

«Աշխարհը կոչ արեց վարձկան ահաբեկիչներից հրաժարվել, և ընդունվեց այդ փաստը, որ կան վարձկան ահաբեկիչներ»,- ասաց նա:

Հիշեցնենք նաև, որ Հայաստանի խորհրդարանը դիմել է ՀԱՊԿ ԽՎ-ին` Աֆղանստանին այդ կազմակերպության դիտորդի կարգավիճակից հեռացնելու կոչով` Աֆղանստանի՝ թուրք-ադրբեջանական ագրեսիային աջակցող հայտարարությունների համար: