Ազգային ժողովի պատգամավոր, Եվրոպական ինտեգրման հարցերի մշտական հանձնաժողովի անդամ Գայանե Աբրահամյանը  նշում է, որ միջազգային հանրությունն արդեն գիտակցում է, որ այս օրերին Արցախի սահմաններում տեղի ունեցող պատերազմը սպառնալիք է նաև իրենց համար: Պատգամավորը «Հետքի» հետ զրույցում նշեց, որ անցել է արդեն իրավիճակին ծանոթանալու փուլը, այժմ միջազգային կառույցներից ակնկալվում են կոնկրետ քայլեր:

Գ. Աբրահամյանի խոսքով՝ առաջին փուլում հիմնական խնդիրը ուղերձը միջազգային կառույցներին հասկանալի դարձնելն էր, թե պատերազմն ով է սկսել, և ինչ հիմնական վտանգներ կան: Տեղեկացնել, որ սա միայն հայ ժողովրդի պատերազմը չէ, ահաբեկչական գործողություն է, որում ներգրավված է նաև Թուրքիան: Դրան հաջորդել են միջազգային կազմակերպությունների ու առանձին երկրների ղեկավարների կոչերը:

Գայանե Աբրահամյանը կարևորում է Եվրոպական խորհրդարանում տեղի ունեցած քննարկումը եւ հնչած դատապարտող ելույթները Թուրքիայի ներգրավվածության առնչությամբ: Աբրահամյանը նշում է, որ ելույթները կարևոր են, սակայն ոչ բավարար, թեև ընդգծում է, որ Եվրոպական խորհրդարանի պատգամավորներից այլ բան ակնկալել պետք չէր:

«Եվրոպական պառլամենտի ներկայացուցիչներից մեկն էլ ասաց՝ եթե միայն կոչերով պետք է բավարարվենք, կասկածի տակ է դրվում կառույցի գոյության իմաստը: Իրենք էլ շատ լավ հասկանում են, որ միայն կոչերով հնարավոր չէ ինչ-որ բանի հասնել»,- ասում է Գ. Աբրահամյանը:

Պատգամավորը նշում է, որ տեղեկատվությունը տեղ հասցնելուց հետո հաջորդ փուլում պահանջները փոխվել են: «Այժմ պահանջում ենք սանկցիաների կիրառում և Արցախի անկախության ճանաչում, որը միակ գործիքն է նոր ցեղասպանությունը կանխելու համար»,- ասում է նա:

Նախկինում Հայաստանը հիմնականում շեշտել է Սումգայիթի ջարդերը, Ադրբեջանի հայատյաց քաղաքականությունը, Գուրգեն Մարգարյանի սպանությունը, Ապրիլյան պատերազմի ժամանակ խաղաղ բնակչության խոշտանգումները՝ որպես ցեղասպանության վտանգ և «անջատում հանուն փրկության» թեզը առաջ մղելու գաղափար: Այսօր իրավիճակն այլ է, և ավելի հեշտ է դառնում հիմնական վտանգների մասին տեղեկությունը տեղ հասցնելը։

«Իրենք էլ արդեն տեսնում են, որ հայերի դեմ կիրառվում են Կոնվենցիայով արգելված զենքեր, խախտվում են հումանիզմի կարևոր սկզբունքները: Հադրութի խաղաղ բնակիչների սպանությունը, ահաբեկիչների ներգրավվածությունը շատ ավելի են հեշտացնում դիվանագիտական դաշտում մեր աշխատանքը՝ ցույց տալու, որ այստեղ գոյության կռիվ է: Տարիներ շարունակ ասել ենք, բայց առանձնապես ընկալում չկար, դարձնում էին որպես տարածքային հարց: Այս առումով ընկալումն արդեն փոխվել է»,- ավելացնում է Գայանե Աբրահամյանը:

Պատգամավորը նշեց, որ հայ հանրությանը թվում է, թե մեր այսօրվա օրակարգը միջազգային հանրության համար առաջնային է, սակայն այդպես չէ: Ադրբեջանը հարձակման ժամանակահատվածը պատահական չէր ընտրել՝ հաշվի առնելով Եվրոպայում COVID-19-ի տարածումը, ԱՄՆ-ում սպասվող նախագահական ընտրությունները, Ռուսաստանում առկա խնդիրները՝ պայմանավորված Բելառուսում ընդվզումներով և այլն: Այսինքն՝ այս պետությունների համար առաջնային այլ հարցեր կային: Աբրահամյանը կարծում է, որ իրավիճակի լուծման համար ակտիվ դերակատարում կարող են ունենալ տարածաշրջանային երկրները, քանի որ այն անմիջապես առնչվում է նաև նրանց շահերին:

«Եթե նախկինում հակամարտությունը, գոնե առերևույթ, հիմնականում Ադրբեջանի և Արցախի միջև էր, ապա այսօր Թուրքիայի ներգրավվածությունը շատ ուղիղ է: Սա, իսկապես, սթափեցնող դեր ուներ Եվրոպայի, Ռուսաստանի համար: Վերջինս, որպես տարածաշրջանի հիմնական խաղացող, որևէ կերպ չէր կարող թույլ տալ, որ այստեղ Թուրքիան իր նկրտումներն առաջ տանի: Այս առումով Եվրոպական խորհրդարանի և մեր գործընկերների վերաբերմունքը ևս հստակ տարբերվում էր: Այսօր էլ «Եվրանեսթ»-ում աշխատաժողով ունեինք, և իմ հիմնական ուղերձն այն էր, որ սա միայն մեր դեմ կամ տարածաշրջանի դեմ սանձազերծված պատերազմ չէ, այլ նաև Եվրոպայի դեմ »,- ասում է Գայանե Աբրահամյանը:

Պատգամավորը հավելում է, որ եթե ահաբեկիչները մտնեն տարածաշրջան, հատկապես Վրաստանի միջոցով, շատ հանգիստ անցնելու են Եվրոպա: Վրաստանն առանց վիզայի ռեժիմ ունի Եվրոպայի հետ: Գայանե Աբրահամյանն ասում է, որ եվրոպացիներն ունեն այդ գիտակցումը:

Նրա համոզմամբ՝ հաջորդ քայլը պետք է լինի սանկցիաների կիրառումը, որոնցից մեկը Ադրբեջանին ու Թուրքիային ահաբեկչական երկրների ցանկում ներառելն է: Ինչպես նաև՝ Արցախի անկախության ճանաչումը՝ որպես միակ ելք այնտեղ ապրող ժողովրդի գոյության համար:

Գայանե Աբրահամյանը նշեց, որ այսօր տեղի է ունեցել ԵՄ երկրների արտաքին գործերի նախարարների նիստը, որի քննարկման թեմաներից մեկը Արցախի հարցն է եղել: