«Մարդկության դեմ գործած հանցագործությունների համար Ադրբեջանին կանգնեցնել միջազգային տրիբունալի առաջ». change.org կայքում այսպիսի պահանջով ստորագրահավաք է նախաձեռնել լեհ քաղաքական գործիչ Թոմաշ Լեխ Բուչեկը (Tomasz Lech Buczek): Վերջինս «Հետքի» հետ զրույցում նշել է, որ անհրաժեշտ է 250 հազար ստորագրություն: Բուչեկի փոխանցմամբ՝ զուգահեռաբար ինքն աշխատում է հայտնի փաստաբանների հետ` հայցը Հաագայի դատարան ներկայացնելու համար: Լեհ քաղաքական գործիչն ասաց, որ այս պահին չի կարող հայտնել փաստաբանների անունները՝ ելնելով նրանց անվտանգությունից: Միաժամանակ նշեց, որ փաստաբանների խումբն ունի Ադրբեջանի կողմից բռնության, օրենքի, ներառյալ՝ Ժնեւի կոնվենցիայի խախտումների մասին մեծածավալ փաստաթղթեր:

«Ադրբեջանին միջազգային տրիբունալի առաջ կանգնեցնելն իմ ավելի վաղ ծրագրերի արդյունք է այն բանից հետո, երբ գիրք հրապարակեցի 1988 թ․ Սումգայիթում հայերի ցեղասպանության մասին»,- ասում է Թ․ Լ․ Բուչեկը: Ըստ լեհ գործչի՝ թեեւ նախատեսել է 250 հազար ստորագրություն, նպատակ ունի դրանց թիվը հասցնել միլիոնի, ինչը ցույց կտա ոչ թե քաղաքական իշխանությունների, այլ աշխարհի քաղաքացիների միասնությունը, ովքեր սիրում են խաղաղությունը:

«Բոլորն ինձ հարցնում եմ՝ իսկ դու ո՞վ ես, միշտ պատասխանում եմ՝ ընդամենը մարդ եմ, սակայն կյանքում առաջնահերթ պետք է անես այն, ինչ անհրաժեշտ է, ապա այն, ինչ հնարավոր է, մինչեւ չես նկատում, որ կարող ենք անել նույնիսկ անհնարին թվացողը»,- ասում է Բուչեկը։

Հարցին, թե արդյոք այս ընթացքում արդեն հասցրել է սպառնալիքներ ստանալ Ադրբեջանից, Բուչեկը դրական պատասխան է տալիս՝ նշելով, որ «Ֆեյսբուքում» ադրբեջանիցներից բազմաթիվ նեգատիվ մեկնաբանություններ է ստանում, չնայած դրանց մեծ մասը շինծու օգտատերեր են։ 

Թոմաշ Լեխ Բուչեկն առաջին անգամ Հայաստան է եկել 2018-ին: Ասում է՝ Վերնիսաժի մոտ հանդիպել էր խաչապուրի վաճառող մի կնոջ: Վերջինս, տեսնելով իր պիջակին ամրացված անմոռուկը, սկսել էր հարցեր տալ: Հետո պատմել էր, որ երկու որդիները զոհվել են Ղարաբաղյան պատերազմի ժամանակ, ու հավելել, որ այդ անմոռուկը կարեւոր խորհրդանիշ է հայերի համար, եւ ինքը հպարտ է, որ Բուչեկը, չլինելով հայ, կրում է այն:

«Հայերեն չգիտեմ, նրա հետ խոսում էի ջարդված ռուսերենով: Նրա կորցրած երկու որդիներին նմանեցրի հայ ազգի երկու որդի-սարերին՝ Մեծ եւ Փոքր Արարատներին: Հենց դա էլ շարժառիթ դարձավ Սումգայիթում հայերի ջարդերի մասին գիրք գրելու համար, որն անվանեցի «Հայ մոր լացը. 1988 թ. Սումգայիթի Հայոց ցեղասպանությունը»: Հրապարակումը նվիրեցի քաջ հերոսների մայրերին»,- ասում է լեհ քաղաքական գործիչը՝ ներկայացնելով Լեհաստանի պատմությունից 1918-1919 թթ. Լվովի հերոսամարտը, որին մասնակցում էին հայ կամավորներ: Նրանցից մեկը Կոնստանտի Զարուգեւիչն էր (Konstanty Zarugiewicz), որը զոհվեց հանուն Լեհաստանի:

Լեհ քաղաքական գործիչը երեկ բաց նամակ է հրապարակել՝ ուղղված Արցախի նախագահ Արայիկ Հարությունյանին: Նամակում հայտնել է, որ առաջիկայում Լեհաստանում ստեղծվելու է Արցախի անկախության ճանաչման քաղաքացիական կոմիտե, որի կազմում ընդգրկված են լինելու Լեհաստանի՝ խաղաղություն սիրող քաղաքացիներ: Կոմիտեի նպատակն է. 

1. Հայ ժողովրդի իրավունքների եւ արժանապատվության պաշտպանությունը
2. Արցախում (Լեռնային Ղարաբաղում) հակամարտությունը դադարեցնելու ուղղությամբ գործողություններ
3. Արցախի Հանրապետությանն (Լեռնային Ղարաբաղին) առնչվող տեղեկատվական գործողություններ
4. Արցախի Հանրապետությունը (Լեռնային Ղարաբաղը) որպես Անկախ պետություն ճանաչելուն ուղղված գործողություններ
5. Արցախում (Լեռնային Ղարաբաղում) հակամարտության ընթացքում վիրավորներին եւ փախստականներին օգնության տրամադրումը:

Կոմիտեն կկազմավորվի առաջիկա օրերին: «Ճանաչե՛նք Արցախը։ Դուք ՄԵՆԱ՛Կ չեք»,- նամակը եզրափակել է Թոմաշ Լեխ Բուչեկը: