Արթուր Վանեցյանը չի կալանավորվի
Երևան քաղաքի ընդհանուր իրավասության դատարանը՝ նախագահությամբ դատավոր Մարինե Մելքոնյանի, քիչ առաջ մերժեց ԱԱԾ նախկին տնօրեն Արթուր Վանեցյանին կալանավորելու վերաբերյալ միջնորդությունը։ Այս մասին «Հետք»-ը տեղեկացավ դատարանից։
Հիշեցնենք, որ Արթուր Վանեցյանը մեղադրվում է Քրեական օրենսգրքի 35-300-րդ հոդվածի 1-ին մասով և 35-305-րդ հոդվածով։ Ըստ առաջադրված մեղադրանքի՝ նախնական համաձայնության գալով Աշոտ Արարատի Ավագյանի, Վահրամ Վաղինակի Բաղդասարյանի և Աշոտ Հրանտի Մինասյանի հետ, Վանեցյանը նախապատրաստել է պետական գործչի սպանություն և իշխանության յուրացում, որպիսի գործողություններն ավարտին չեն հասցվել իրենց կամքից անկախ հանգամանքներով։ Խոսքը վարչապետ Նիկոլ Փաշինյանի սպանությունը նախապատրաստելու մասին է։
Վանեցյանը քրեական գործի շրջանակներում ձերբակալվել է, սակայն նոյեմբերի 15-ին դատարանը ոչ իրավաչափ է ճանաչել նրա ձերբակալման որոշումն ու նրան ազատ արձակել, որից հետո քննվել է նրան կալանավորելու վերաբերյալ ԱԱԾ-ի միջնորդությունը։
Նշենք, որ Երևանի ընդհանուր իրավասության դատարանն այսօր քննել և մերժել է նույն գործով մեղադրյալ, ԱԺ ՀՀԿ խմբակցության նախկին ղեկավար Վահրամ Բաղդասարյանին կալանավորելու միջնորդությունը։
Մեկնաբանել