«Որոշում կայացրել եմ, որ զորացրվեմ բանակից դեռ հոկտեմբերի հինգին, ինչու այն ժամանակ զեկուցագիր չեմ գրելու զորացրվելու, որովհետև հաշվի եմ առել, որ պատերազմի ժամանակ իմ որոշումը վնաս է հասցնելու զինված ուժերին»:

Նոյեմբերի 19-ին հրավիրված ասուլիսում ասաց Պաշտպանության նախարարության ռազմական վերահսկողական ծառայության նախկին պետ, Արցախի պաշտպանության նախկին նախարար, ՀՀ զինված ուժերի գլխավոր շտաբի նախկին պետ, գեներալ-գնդապետ Մովսես Հակոբյանը: Վերջինիս խոսքով` որոշել է սպասել մինչ պատերազմի ավարտը և հնարավորության սահմանում աջակցել բանակին, սակայն պաշտոնից հեռանալու որոշումը վերջնական կայացրել է վարչապետ Նիկոլ Փաշինյանի հայտնի գրառումից հետո, երբ կոչ էր արել կռվող տղաներին վերադառնալ հրապարակ և, իր խոսքով, վնգստացողներին դուրս մղել հրապարակից:

«Այդ պահին որոշումս կյանքի եմ կոչել և զեկուցագիր եմ գրել բանակից զորացրվելու համար»,- ասաց Մովսես Հակոբյանը:

Թե ինչու ռազմական գործողությունների ընթացքում չի խոսել, իր իսկ տված հարցին գեներալ-գնդապետը մանրամասնեց` զինվորականերն առանց համապատասխան թույլտվության որևէ ինֆորմացիա հրապարակելու իրավունք չունեն: Այժմ էլ խոսում է, քանի որ պատերազմի 44 օրերի ընթացքում ստի տարածումը ոչ թե օգուտ է բերել երկրին, այլ՝ քայքայել:

Նախկին բարձրաստիճան զինվորականը խոսեց զինված ուժերի ինֆորմացիոն կենտրոնի մասին, որի խնդիրներից մեկը հակառակորդին մոլորության մեջ գցելն է` այդ թվում ստի միջոցով, սակայն այն չպետք է գերազանցի իրականության 30%-ը, իսկ հայկական կողմի սուտը գերազանցել է 100%-ը: Եւ սա է պատճառը, որ հասարակության համար այս իրավիճակն ընկալելի չէ, և մի մասը պնդում է, որ պատերազմը պետք է կանգնեցնել, մեկ այլ մասը պնդում է, որ հաղթում էինք:

Նրա խոսքով՝ իր համար մինչ այս պահն անհասկանալի է, թե ինչու է վարչապետի հրամանով հեռացվել Արցախից: Խոսելով վարչապետի տիկնոջ` Աննա Հակոբյանի հետ տեղի ունեցած միջադեպից, որի մասին հայտնել էին տարբեր լրատվամիջոցներ, Մովսես Հակոբյանն ասաց, որ վարչապետի տիկինը հրամանատարական կետում է եղել և հետևել էկրանին ցուցադրվող մարտական գործողություններին: Այնտեղ է եղել նաև Սամվել Բաբայանը:

«Տիկին Աննան նստած էր, դիտարկում էր, որևէ հարցի չէր միջատում, չէր խոսում, երբ ավարտվեց մոտեցա, ասեցի` տիկին Աննա, նման տեսարժան բաներ չեն լինելու, մնացած ուղղություններով մարտեր են ընթանում, նպակահարմար է գնաք, որովհետև տղաները խոսում են, գոռում, կարող է նաև հայհոյեն, կաշկանդվում են ձեզնից: Ասեց լավ, քսան րոպե անց գնաց, չորս ժամ անց ինձ կանչեցին Երևան»,- պատմեց Մովսես Հակոբյանը:

Բանախոսի ներկայացմամբ` մտածել է, թե Երևան են կանչել, քանի որ վարչապետն է ցանկացել իր հետ խոսել, դեռ սեպտեմբերի 30-ից իրավիճակից վերաբերյալ զեկույց է կազմել, սակայն վարչապետն իրեն չի ընդունել: Երևան հասնելուց հետո պաշտպանության նախարարն ասել է` վարչապետը հրահանգել է թույլ չտալ իրեն Արցախ մեկնել:

Գեներալ-գնդապետը ընթերցեց նաև վարչապետի հեռախոսահամարին իր ուղարկած հաղորդագրությունները, որոնք այդպես էլ անպատասխան են մնացել:

«Չեմ կարողանում մնալ այստեղ, ուղարկեք Արցախ, սիրտս պայթում է, նամակը չի էլ բացել»,-ընթերցեց Հակոբյանը:

• Մովսես Հակոբյանի համոզմամբ՝ պարտության պատճառն անգրագիտությունն ու պատերազմի արվեստին չտիրապետելն է
• Մովսես Հակոբյան. ««Իսկանդեր» կիրառվել է, բայց թե որտեղի վրա, չեմ ասի»

Լուսանկարը՝ Ֆոտոլուրի